Japonia dhe Koreja e Jugut po përballen me një valë të paprecedentë të nxehti, e cila ka shkaktuar temperatura rekord dhe një rritje të ndjeshme të rasteve të urgjencave mjekësore. Autoritetet në të dy vendet kanë bërë thirrje për kujdes të shtuar, veçanërisht për të moshuarit, të cilët janë më të rrezikuarit nga pasojat e kësaj vale përvëluese.
Në Japoni, u regjistrua dita më e nxehtë ndonjëherë me 41°C, ndërsa spitalet janë përmbytur me qytetarë që vuajnë nga lodhja, dehidratimi dhe çrregullime të tjera të shkaktuara nga temperaturat ekstreme. Sipas Agjencisë së Menaxhimit të Zjarreve dhe Fatkeqësive, në javën deri më 21 korrik, mbi 10,800 persona kërkuan ndihmë mjekësore për shkak të nxehtësisë mbi gjysma prej tyre ishin mbi 64 vjeç. Fatkeqësisht, 16 persona kanë humbur jetën.
Edhe Koreja e Jugut po përjeton një situatë të ngjashme alarmante. Sipas Zyrës Meteorologjike Koreane, vendi ka kaluar 22 net tropikale rresht këtë muaj një rekord që tregon për intensitetin dhe vazhdimësinë e të nxehtit. Deri më tani, 13 persona kanë vdekur nga shkaqe të dyshuara që lidhen me temperaturat e larta – trefish më shumë se në të njëjtën periudhë të vitit të kaluar.
Ekspertët e klimës theksojnë se nxehtësia nuk po largohet, por po grumbullohet dita-ditës, duke krijuar kushte të rrezikshme për shëndetin publik. “Kur kushtet e ngrohta vazhdojnë për disa ditë, nxehtësia nuk zhduket plotësisht – ajo akumulohet,” tha Youn Ki-han nga Zyra Meteorologjike në Seul.
Autoritetet në të dy vendet kanë nxjerrë udhëzime të posaçme për qytetarët, duke i këshilluar të qëndrojnë në ambiente të freskëta, të shmangin daljet gjatë orëve më të nxehta të ditës dhe të konsumojnë shumë lëngje. Shërbimet shëndetësore janë vendosur në gatishmëri të lartë për të përballuar fluksin në rritje të pacientëve.
