Klasat fillore të shkollës 9-vjeçare "Selam Musai’’ në Babicë të Vlorës, që prej 1 shtatorit e kryejnë procesin mësimor në një lokal dasmash.
Sipas mësuesit, kjo zgjidhje u bë me kërkesë të prindërve, të cilët nuk kishin mundësi të dërgonin fëmijët e tyrë në shkollat e Vlorës, derisa të përfundojë rikonstruksioni i shkollës së Babicës.
"Është një zgjedhe në kushte emergjence. Prindërit nuk donin që t'i lëviznin fëmijët larg", thotë për A2, mësuesi i klasës së parë dhe të dytë.
Këtë fakt e pohojnë edhe vetë prindërit, të cilët edhe pse pranojnë faktin që në këtë mënyrë nuk mund të kryhet mësim, sërish shprehen se ishte e vetmja zgjidhje në pamundësi për t’i dërguar fëmijët në shkollat e Vlorës.
Ndërkohë, nga Drejtoria Arsimore e Vlorës, shprehen se nxënësit e shkollës “Selam Musai”, e kryejnë mësimin me turne në shkollën "Teli Ndini” dhe nuk janë fare në dijeni që fëmijët e kryejnë procesin mësimor në një lokal dasmash.
