Qindra vajza të vogla janë shtruar së fundmi në spital pasi u sulmuan me gaz helmues brenda shkollës së tyre. Që nga nëntori, sipas një raporti të ri të BBC-së, vlerësohet se më shumë se 1000 nxënëse kanë qenë në qendër të sulmeve të tilla, duke iu shkaktuar atyre probleme shëndetësore, vështirësi me frymëmarrjen, të përziera dhe lodhje. Dyshohet se autorët po tentojnë t'i detyrojnë vajzat të braktisin studimet dhe t'i mbyllin shkollat. Në fakt, agjencia e lajmeve "Fars" raportoi se tre të dyshuar janë arrestuar, por ministri i Brendshëm Ahmad Vahidi e quajti këtë informacion "të rremë". Një tjetër skenar që qarkullon mes prindërve dhe nxënësve është se vajzat janë vënë në shënjestër për pjesëmarrjen e tyre në protestat antiqeveritare që kanë shpërthyer pas vrasjes së Mahsa Amini nga “policia e moralit”. Mediat lokale dhe aktivistët pretendojnë se të paktën 26 shkolla nga pesë qytete iraniane janë sulmuar me gaz helmues. Videot tregojnë disa vajza në spital që oksigjen. Në një video nga një shkollë fillore, një nënë vrapon në hyrje duke bërtitur: "Ku është fëmija im?" Një burrë i përgjigjet: “I helmuan studentët me gaz”.

 

View this post on Instagram

 

A post shared by Reuters (@reuters)

Vlerësimet e viktimave janë midis 800 dhe 1200 nxënëse. Sipas rrëfimit të një prindi për BBC: “Vajza ime dhe dy nga shoqet e saj thanë se dëgjuan atë që dukej si një shpërthim dhe menjëherë më pas ndjenë një erë të keqe, si plastika e djegur, që mbushte ajrin. Ata i kërkuan që të linin klasën në oborr. Shumë nxënëseve filloi t'iu binte të fikët. Në klasën e vajzës sime kemi fëmijë me astmë dhe probleme me zemrën. Erdhën ambulancat dhe policia. Infermieret u jepnin fëmijëve qumësht për të pirë”. Kur ministri i Shëndetësisë, Younes Panahi tha se "është e qartë se disa njerëz duan të mbyllin shkollat, veçanërisht për vajzat", ai më vonë u përpoq të tërhiqte vërejtjet e tij, duke pretenduar se ato ishin keqinterpretuar./Liberale.al