Hapësira e Qendrës për Hapje dhe Dialog do të jetë galeria e re studentëve të Arteve Pamore në Universitetin Europian të Tiranës. Punimet e tyre më të mira, pas prezantimit në ambientet akademike e studentore, do të transferohen në një tjetër mjedis që mikëpret artin dhe talentin.
"Pikëpamje dhe prapaskena: Eleganca e modës në vizatime" titullohet ekpozita e tyre, e cila do të çelet të mërkurën, 5 mars, ora 17:00 në COD, Kryeministri. Aty do të paraqiten punime nga studentët e vitit të tretë të programit të studimit Arte Pamore në Departamentin e Arteve të Aplikuara.
Punimet e përzgjedhura të studentëve që janë në semestrin e dytë të vitit të fundit të ciklit bachelor, shprehin kreativitetin dhe novatorizmin që sjellin në fushën e pikturës dhe modës, duke zbuluar përtej pasionit për të bukurën dhe artin, edhe këndvështrime mjaft origjinale që kërkojnë mënyra të reja mendimi dhe veprimi për kohërat që po jetojmë.
