Kuptimi i politikës sipas Carl Schmitt, juristit dhe teoricienit gjerman, ishte tema e diskutimit në takimin e Shkollës Kontekstualiste. Idetë e tij të përmbledhura në librin “The concept of political” erdhën përmes zbërthimit dhe kontekstualizimit të Bledi Dika, pedagog i Drejtësisë në Universitetin “Aleksandër Xhuvani” në Elbasan.
Ky ishte takimi i gjashtë për vitin akademik 2024-2025 i Shkollës Kontekstualiste në Universitetin Europian të Tiranës, një platformë diskutimi për të gjithë të pasionuarit pas filozofisë dhe teorive politike. Një traditë disavjeçare në UET, e cila bën së bashku çdo muaj pedagogë dhe studentë, që sjellin këndvështrimet e veta përmes teorive dhe botimeve të studiuesve e filozofëve më të njohur, e më të cituar në botë.
I lindur në Plettenberg, Gjermani, në vitin 1888, Schmitt, përveçse si kritizier i liberalizmit, njihet edhe si filozofi më famëkeq, pasi mbi idetë e tij u ngritën themelet e Rajhut të Tretë. Ai iu bashkua Partisë Naziste në vitin 1933, kur ishte profesor i drejtësisë, dhe do të vazhdonte të shkruante racionalizimet e tij më brutale dhe antisemitike për regjimin të cilit i shërbeu.
Në vitin 1935, ai vlerësoi Ligjet e Nurembergut për heqjen e angazhimit për të "trajtuar në mënyrë të barabartë të huajt dhe gjermanët" dhe do të mbrojë me zell spastrimet vrastare të Hitlerit në 1934, e njohur si Nata e Thikave të Gjata.
Në botimin “Koncepti i politikës”, i kompozuar në 1927 dhe i përpunuar plotësisht në 1932, Schmitt e përkufizoi "politikën" si prirjen e përjetshme të kolektiviteteve njerëzore për të identifikuar njëri-tjetrin si "armik". "Dallimi specifik politik në të cilin mund të reduktohen veprimet dhe motivet politike është ai midis mikut dhe armikut", shkruante ai.
Lidhur me shtetin, Schmitt ndjek Max Weber duke e parë shtetin si monopol mbi forcën dhe dhunën. Shteti “[ka] rastin vendimtar [të] autoritetit përfundimtar” dhe “shteti është me të vërtetë një entitet eminent i qartë që përballet me grupe dhe çështje jopolitike”. Shteti dhe politika, siç përfundon Schmitt, janë të pandashme nga njëri-tjetri dhe nuk mund të asgjësohen.
