Kolegji Profesional i Tiranës e ka filluar dekadën e dytë të veprimtarisë me ndryshime dhe ambicie të reja. Ky institucion 2-vjeçar i arsimit të lartë profesional, dedikuar përgatitjes së teknikëve të lartë dhe zbatuesve të projekteve, nis etapën tjetër zhvillimit dhe transformimit me rektorin e ri, prof. dr. Andonaq Londo (Lamani). Rektori i parë dhe i vetëm i dekadës së parë, prof. dr. Luan Karçanaj do të mbajë postin e Presidentit të Nderit në KPT.
Duke kujtuar fillesat dhe rrugëtimin e këtij institucioni, themeluesi Laert Duraj, vlerësoi përkushtimin dhe përpjekjet e bëra ndër vite të stafit, me në krye rektorin Karçanaj, për të ndryshuar jetën e shumë të rinjve. Edhe pse logoja nuk është më e njohura në treg, Duraj tha se numri i studentëve ka ardhur duke u rritur për shkak të ofertës dhe cilësisë akademike, teksa theksoi mundësitë që ofrohen në tregun e punës brenda dhe jashtë vendit.
“Trendi dhe tendencat e fundit janë kthyer drejt inxhinierive dhe profesioneve që jo vetëm nuk të lënë në pamundësi, por janë pjesë e një tregu të madh në Europë e më gjerë.” Më tej, Duraj i uroi suksese rektorit të ri, i cili vjen me dinamikë, energji dhe vizion tjetër.
Pas 42 viteve në Universitetin Politeknik të Tiranës, prof. dr. Andonaq Londo zgjodhi të largohet për herë të parë nga ky institucion për të marrë detyrën e rektorit të Kolegjit Profesional të Tiranës. I diplomuar në 1979-ën në degën Inxhinieri Mekanike dhe i specializuar në fushën e energjive, prof. Londo, përveçse pedagog në UPT, ka mbajtur edhe postin e dekanit gjatë viteve 1999-2003 dhe 2008-2016.
“Ndjehem i emocionuar dhe iu falënderoj për propozimin që më bëtë. Jam i bindur që do të bëjmë maksimumin, jo vetëm me përmirësimin dhe çuarjen më lart të shtyllave që ka ngritur prof. Luani, si në tregun e brendshëm të arsimit ashtu edhe në pjesën e ndërkombëtarizimit”, theksoi prof. Londo.
Ish-rektori i KPT-së, prof. dr. Luan Karçanaj falënderoi stafin akademik për përkushtimin e treguar në edukimin e të rinjtë me profesionet e duhura, ndërsa nuk la jashtë vëmendjes administratën dhe mbështetjen e saj në lehtësinë që i ka krijuar për të kryer detyrën.
“Me punën tuaj keni lartësuar punën e pedagogut dhe keni bërë më të mirën për të ndihmuar ata studentë që kanë dëshirë të edukohen dhe formohen”, theksoi ai.
Me një karrierë të gjatë akademike, Karçanaj u bë pjesë e KPT-së që prej themelimit në 2015-ën, duke kontribuar thelbësisht në krijimin e identitetit të këtij institucioni, hapjen dhe shtimin e programeve të studimit, rritjen e numrit të studentëve, përmirësimin e kurrikulave etj.
“Kolegji është këtu ku është, dhe drejtimi juaj ka shkëlqyer, padiskutim me mbështetjen e stafit. Ju falënderoj për drejtimin, mentorimin, kujdesin deri në detaje që ju i keni kushtuar veprimtarisë së jetës së kolegjit”, tha më tej administratorja e kolegjit, Diana Biba, duke i uruar mirëseardhjen dhe suksese rektorit të ri.
Kolegji Profesional i Tiranës u krijua si një institucion që mbush boshllëkun e tregut të punës për disa profesionistë që i duhen biznesit dhe industrisë. Aktualisht ai ofron 10 programe studimi: Teknologji Informacioni dhe Komunikimi; Elektronikë; Database dhe Web Design; Teknologji e Instalimeve Elektrike; Administrim Zyre; Elektro- Mekanikë; Teknologji Automjetesh; Teknologji Ajrimi dhe Kondicionimi; Gjeodezi; Teknologji Ndërtimi.
