Konfliktet brenda sallës së Kuvendit, debatet e ashpra dhe tensionet që shkojnë deri aty sa duhet të ndërhyjë garda për të shmangur përplasjet fizike, japin përshtypjen në publik të një luftë të ashpër politike.
Por ajo që shihet në dalje të Kuvendit është një pamje tjetër. Deputetë që qeshin, përqafohen dhe kuvendojnë në kafe, për shtatë palë qejfe.
Sot ishte një tjetër atmosferë në sallën e Kuvendit. Demokratët me në krye Sali Berishën kërkuan praninë e kryeministrit Edi Rama, ndërsa vijuan me akuzat ndaj tij dhe kryebashkiakut Erion Veliaj, i cili pas arrestimit u dërgua mbrëmjen e djeshme në paraburgimin e Durrësit.
Mes tensioneve dhe akuzave, kryeparlamentarja Elisa Spiropali ndërpreu dy herë seancën, për ta mbyllur përfundimisht dhe lënë të hënën që vjen, pas përjashtimit të deputetit Flamur Noka.
Sekretari i Përgjithshëm i PD-së Flamur Noka pasi bllokoi foltoren, goditi me shishe uji ministrin Taulant Balla.
Në atë moment Noka u bllokua nga forcat e Gardës për të mos shkuar drejt ministrit Balla.
Ishte përmendja e tragjedisë së “21 janarit” me katër të vdekur nga ana e deputetit Toni Gogu që acaroi më shumë demokratët, të cilët kërkuan fjalën, por nuk u lejuan nga Spiropali, e cila kërkoi mbajtjen e radhës së fjalës në foltore.
Më pas ishte ministri Manja, i cili komentoi deklaratat e Berishës brenda dhe jashtë sallës së Kuvendit, duke i thënë se e ka zili për mënyrën se si po e kalon pleqërinë.
Nga ana tjetër, edhe deputeti demokrat Petrit Doda hoqi mikrofonin nga vendi dhe bllokoi foltoren dhe pas ndërhyrjes së Gardës ai i hodhi kabullin e mikrofonit kryeparlamentares Spiropali.
Ishte edhe deputetja Elda Hoti që u përfshi në një episod të paprecedentë në seancë, ku u mori kartat e socialistëve për të penguar votimin.
Pas gjithë këtyre tensioneve , në dalje deputetët dhuruan një tjetër “shoë”. Kryetari i PD-së Sali Berisha u kap duke bërë humor me Damian Gjiknurin teksa po futej në makinë, ndërsa deputetë socialistë e demokratë duke qeshur.
