Një tjetër kthesë dramatike në hetimet për vrasjen makabre të 22-vjeçares shqiptare Ilaria Sula. Autori i dyshuar, Mark Samson, ka ndryshuar sërish dëshminë duke pretenduar se dikush e ka parë në momentin kur po transportonte trupin e pajetë të Ilarias në një valixhe drejt makinës së tij.
“Jam i fortë, e ngarkova vetë valixhen. Më ka parë edhe një person,” shkruan ai në një letër të dorëzuar prokurorëve nga avokatët e tij, duke ngritur pikëpyetje të mëdha për autoritetet: kush është dëshmitari dhe pse nuk është paraqitur deri më sot?
Deklarata e re vjen ndërsa hetuesit kanë zbuluar se 23-vjeçari ka gënjyer vazhdimisht, duke fshehur dështimin në studime, rolin e nënës së tij në pastrimin e vendit të krimit dhe duke manipuluar telefonin e viktimës për të krijuar alibi të rreme.
Rrëfimi i fundit i Samson ka rikthyer në qendër të vëmendjes një dosje që ka tronditur opinionin publik, ndërsa policia është në kërkim të dëshmitarit misterioz që mund të zbulojë të vërtetën e plotë të kësaj tragjedie.
