Policia e Lushnjës ka sekuestruar një apartament me vlerë 270 000 euro, i cili është në pronësi të një shtetasi 32-vjeçar të identifikuar si Marsel Korreshit, të dënuar nga gjykata për trafik droge.
Sipas veprimeve hetimore rezulton se prona është vendosur në bazë të pasurisë së ardhur nga aktiviteti kriminal i 32-vjeçarit.
Njoftimi i policisë:
“Nga specialistët e seksionit për Hetimin e Krimeve Ekonomiko-Financiare të Drejtorisë Vendore të Policisë Fier, në bashkëpunim me Prokurorinë pranë Gjykatës së Rrethit Gjyqësor Lushnjë, u bë ekzekutimi i vendimit të Gjykatës së Rrethit Gjyqësor Lushnjë, i datës 03.10.2022, për vendosjen e sekuestros preventive ndaj pasurisë së shtetasit M. K., 32 vjeç, banues në Lushnjë, i dënuar më parë, për veprën penale “Prodhimi dhe shitja e lëndëve narkotike”.
Nga veprimet hetimore rezulton se pasuria e 32-vjeçarit ka si burim veprimtari kriminale.
Vijojnë hetimet dhe verifikimet për evidentimin e pasurive të tjera që mund të jenë në emër të këtij shtetasi dhe të personave të lidhur me të”, thuhet në njoftimin e policisë.
