Chelsea është zyrtarisht kampioni i parë i Kupës së Botës për Klube, sipas formatit të ri që nisi në vitin 2025. Turneu u zhvillua në SHBA me pjesëmarrjen e 32 skuadrave nga të gjitha kontinentet, dhe Blutë e Londrës triumfuan në finale ndaj PSG-së me rezultatin bindës 3-0.
Ky sukses ka marrë një vlerë të veçantë, pasi FIFA e ka shpallur këtë trofe si të vetmin titull zyrtar të Botërorit për Klube, duke ndarë përfundimisht turneun e ri nga formatet e mëparshme.
Çfarë ndodh me fituesit e mëparshëm?
Në të njëjtin vendim, FIFA ka riklasifikuar të gjitha trofetë e mëparshëm të Botërorit për Klube, duke i kategorizuar si “FIFA Intercontinental Champions”.
Kjo do të thotë se klube si: Real Madrid (me 5 trofe të mëparshëm), Barcelona, Manchester United, Liverpool, Manchester City, Bayern Munich, Inter, Milan dhe shumë të tjera, nuk njihen më si kampionë të botës, por vetëm si fitues të një turneu ndërkontinental, që nuk ka statusin e Kupës së Botës për Klube.
FIFA ka theksuar se ky ndryshim është bërë për të ndarë qartë turneun e ri – me pjesëmarrje të gjerë dhe strukturë të barabartë – nga formatet e kaluara me numër të kufizuar ekipesh dhe përfaqësime më pak përfshirëse.
Ky vendim ka ngjallur debat në rrjetet sociale dhe në komunitetin futbollistik. Disa tifozë e quajnë një “fshirje historike” që nënvlerëson sukseset e gjigantëve si Real Madrid dhe Barça, ndërsa të tjerë besojnë se ky është një hap i duhur për të krijuar një standard të qartë për trofetë e ardhshëm.
Chelsea, që më parë kishte fituar Botërorin e Klubeve në vitin 2021, tashmë konsiderohet fituesi i vetëm “zyrtar” sipas definicionit aktual të FIFA-s.
Ky vendim i FIFA-s shënon një kthesë historike dhe rishkruan renditjen e lavdisë botërore për shumë prej klubeve më të mëdha në histori. Në vitet që vijnë, do të shihet nëse kjo reformë do të pranohet me entuziazëm apo do të vazhdojë të sfidohet nga tradita dhe tifozët e hershëm të futbollit.
