Futbollisti shqiptar Agim Zeka ka kaluar me sukses testet mjekësore te klubi spanjoll Real Murcia. Klubi i njohur i ligës së tretë spanjolle ka publikuar disa foto nga kontrollet mjekësore, përpara se Zeka të bashkohet zyrtarisht me ekipin.
Zeka u prezantua pak ditë më parë nga Real Murcia, ndërsa ai u largua nga Partizani në një moment të papritur, vetëm pak ditë para ndeshjeve në Kupat e Europës.
26-vjeçari do të provojë një aventurë të re në futbollin spanjoll, duke luajtur në Primera Federación, që është liga e tretë për nga rëndësia në Spanjë.
Edhe pse te Partizani nuk qëndroi gjatë, ai arriti të tërheqë vëmendjen e Kombëtares shqiptare, duke u thirrur në grumbullim, megjithëse nuk debutoi në fushë.
Karriera e Zekës ka qenë e larmishme, ku ai ka luajtur në disa vende si Kosova, Franca, Austria dhe Portugalia. Tani, me hapin e ri në Spanjë, Zeka do të kërkojë të tregojë vlerat e tij dhe të ndihmojë Real Murcian në sezonin e ardhshëm.
