Jo  dasmë të tretë me BE-në?!

I ftuar në një simpozium nga ish-kryeministri grek Papandreu, Rama nuk e fshehu zhgënjimin për vendimin e fundit të BE-së, që nuk arriti të caktojë një datë për konferencën e parë ndërqeveritare për dy kandidatet ballkanike. Por, megjithëse kryeministri shqiptar u shpreh prerë se nuk do të kishte përgatitje për një dasmë të tretë me unionin, pas zhgënjimit për të dytën herë radhazi, pranoi se procesi ishte i rëndësishëm për të ardhmen. Ai gjithashtu i bëri thirrje  Greqisë t’i kthente sytë nga rajoni

Suadela Balliu

Pas takimeve me liderët e Ballkanit, ku ka theksuar rëndësinë e bashkëpunimit rajonal përmes të ashtuquajtur Mini-Shengen dhe nuk e ka fshehur zhgënjimin e fundit ndaj BE-së, kryeministri Rama është drejtuar nga fqinji jugor, anëtari unionit dhe gjithaq shkaktare e ngërçit të mëhershëm ndaj Maqedonisë së Veriut për çeljen e negociatave, deri në arritjen e Marrëveshjes së Prespës.

I ftuar nga ish-kryeministri grek, George Papandreu, në edicionin e 23-të të “Symi Symposium”, Rama i bëri thirrje Greqisë t’i kthente sytë nga Ballkani, duke luajtur një rol të rëndësishëm.

Kreu i qeverisë shqiptare nuk i kurseu kritikat ndaj Bashkimit Europian, i cili nuk arriti as këtë qershor të caktonte një datë të konferencës së parë ndërqeveritare për dy kandidatet ballkanike për anëtarësim.

Sipas Ramës, vetoja e Bullgarisë e cila kërkon nga Maqedonia e Veriut të njohë rrënjët bullgare të gjuhës dhe identitetit të saj kombëtar është shembull se kjo anëtare e re e unionit ka mësuar nga më të mëdhenjtë.

Për kreun e qeverisë shqiptare, i cili në shtator nis zyrtarisht mandatin e tretë, Shqipëria po mbahet peng e nacionalizmave të BE-së.

Bullgaria mësoi se mund të përdorësh politikën për të bllokuar të tjerët. Nuk doja ta përmendja, në Ballkan kur kopjojmë shkojmë më tutje se origjinali”, u shpreh Rama, duke mos e kursyer ironinë edhe ndaj Greqisë, e cila pati ngërç me Maqedoninë e Veriut për çështjen e emrit.

Ashtu si edhe herë të tjera, Rama tha i bindur se BE ka nevojë për Ballkanin, po aq sa rajoni ka nevojë për BE-në.

Ai e krahasoi Ballkanin si një gropë në mes të BE-së, i rrethuar nga vende anëtare.

Me gjithë notat pozitive dhe ndryshimin e qëndrimit skeptik të vendeve si Franca e Holanda, në samitin e fundit të ministrave të Jashtëm të BE-së në Luksemburg nuk u arrit dakordësia që dy vendeve kandidate t’u caktohej një datë për konferencën e parë ndërqeveritare. Megjithatë u la e hapur rruga për muajt në vijim, nën presidencën sllovene të Bashkimit Europian.

Kryeministri shqiptar iu rikthye metaforës së dasmës, përdorur edhe më herët në lidhje me çeljen e negociatave.

“Në Shqipëri e kemi parë veten për dasmën e madhe me të gjitha dekorimet sepse Komisioni Europian tha se jemi gati për procesin e integrimit”, do të shprehej Rama, ndërsa vizita e komisionerit për Zgjerim Varlehyi në Tiranë ishte optimiste për të dy vendet e Ballkanit. Optimizëm që u shtua edhe nga vizita e ministrit gjerman për Çështjet Europiane, Michael Roth.

“Dasma e parë, nusja nuk erdhi, dasma e dytë nusja nuk erdhi, nuk ka përgatitje për dasmën e tretë, në djall. I tërë vendi mbetet sikur është tradhtuar”, është shprehur kryeministri i zhgënjyer.

Pas vendimit nga Brukseli, i përgatitur për çdo përgjigje siç e pohoi vetë në një intervistë në Francë, Rama do të shprehej se ishte BE ajo që kishte dështuar, jo Shqipëria.

Pas vetos së Francës dhe Holandës vjeshtën e 2019-s për të mos i çelur negociatat me dy kandidatet, më vonë nisën të qarkullojnë zërat e një ndarje të mundshme mes Shqipërisë dhe Maqedonisë së Veriut në këtë proces, të nisur bashkë. Rama e cilësoi në disa intervista si padrejtësi, ndërsa pas po-së së Këshillit Europian pranverën e vitit të kaluar, ishte Bullgaria ajo që u bë pengesë e procesit, duke qenë pro Shqipërisë dhe kundër Maqedonisë së Veriut, derisa kjo e fundit të pranojë rrënjët bullgare.

Ndonëse e ka shprehur qartë në disa aktivitete ndërkombëtare se vendi nuk është sot gati për t’iu bashkuar BE-së, kryeministri ka qenë i bindur se qeveria e tij i ka plotësuar kushtet për fazën e negociatave.

Kryeministri vijoi se Shqipëria nuk mund të vazhdojë me pritshmëri, pas një viti pritjeje, qysh se pranverën e shkuar Këshilli Europian vendosi pro çeljes së negociatave me dy vendet, duke vendosur 15 kushte për Shqipërinë. Kushte që Rama i cilësoi të çuditshme, ndërsa deri më tani janë përmbushur disa prej tyre si Reforma Zgjedhore dhe ngritja dhe funksionimi i Gjykatës Kushtetuese dhe asaj të Lartë.

“Në fund na u desh të themi që ne duhet të vazhdojmë, ky proces është i rëndësishëm për fëmijët tanë”, pohoi ai, duke rrëzuar kështu batutën se nuk do të kishte një “dasmë” të tretë me Bashkimin Europian.

E përsëritur ishte edhe ironia e tij se Shqipëria do të hyjë në union, kur Turqia të ketë presidencën.

“Europesimisti thotë që Shqipëria do hyjë në BE kur Turqia të ketë presidencën, euro-optimisti thotë që Turqia do të hyjë në BE kur Shqipëria të ketë presidencën”, deklaroi ai, ndërsa foli për lehtësimin e procedurave në kufijtë e vendeve të rajonit ashtu edhe me Greqinë.

“Duhet të ecim përpara përmes asaj që mund të bëjmë vetë dhe të mos presim nga të tjerët. Duhet që të bëjmë sa më shumë reforma që lehtësojnë lëvizjen e njerëzve dhe të mallrave”, u shpreh kryeministri shqiptar.

Me alegorinë e dasmë, kryeministri shqiptar megjithatë do të shprehej se nuk ishte rasti për të rënë pre e zhgënjimit dhe dëshpërimit. “Sepse, e kemi mësuar këtë moton: “Na merrni se po të mos na merrni ju do na marrin të këqijtë, po s’u martuat ju me ne do dalin ca të përdala të na marrin”. Por nuk funksionon kështu”, tha ai, duke iu referuar edhe frikërave të disa anëtarëve të BE-së që shohin rrezikun e mbushjes së hendekut të krijuar nga BE, prej ndikimeve të huaja si Rusia apo Kina. Por megjithë zhgënjimin e tij, kryeministri ka artikuluar gjithnjë se e vetmja rrugë për vendin është anëtarësimi në Bashkimin Europian.

Pesë prioritetet në mandatin e tretë, Rama: Duam të bëjmë turizëm elitar

Kryeministri Edi Rama ka prezantuar prioritet e qeverisë së tij në mandatin e tretë. Nga energjia, turizmi, bujqësia, infrastruktura dhe teknologjia, këto ishin pikat kyçe që Rama i cilësoi në Athinë.

“Ne kemi një bazë mjaft të fortë dhe potencial për të ardhme sepse dua të theksoj që jemi tërësisht me energji të rinovueshme, prodhimi energjetik mbështet te energjia hidrike, por punojmë për energjinë diellore dhe të erës, kemi dy zona të mëdha për energjinë diellore që do jenë parqet më të mëdha në Ballkanin Perëndimor, kemi ecur shumë përpara në procesin e parashikimeve të pjesës finale, përfundimtare të prodhimit më të rëndësishëm të energjisë hidrike, praktikisht kjo do të përmbyllë këtë qark sepse do të shërbejë si një ekulibrues i hidrocentraleve që kur të kemi më shumë se sa duhet do të na ndihmojë. Kur kemi reshje të dendura dhe më shumë ujë nga sa mund të përdorim hapim dyert e digave dhe në fakt kjo krijon përmbytje që na shqetëson se ka mijëra hektarë tokë bujqësore që përmbytet dhe shumë dëme që duhen kompensuar e kështu me radhë, por nga ana tjetër kur kemi thatësisë jemi të detyruar që të blejmë në tregje me çmime të larta, kemi potencialisht mundësinë që të bëhemi eksportues neto të energjisë që do të na kursejë shumë para. Në turizëm shohim shumë potencial, e dimë që kjo vjen me shumë rreziqe, po përpiqemi që të mësojmë nga gabimet tona, ne po përpiqemi që ta mbajmë zhvillimin në kontroll duke inkurajuar gjetjen e zgjidhjeve që janë elitare dhe jo domosdoshmërish të turizmit masiv. Do të kemi 4 porte të rëndësishme. Bujqësia ka njohur rritje, duam të rritemi edhe më tej, duam të shkojmë mbi 1 mld për eksportet, sa i takon infrastrukturës duhet të ndërtojmë shtyllën kurrizore të vendit, që është korridori blu, kjo është hallka që mungon në korridorin e BE, mes Kroacisë, Malit të Zi dhe Shqipërisë, do hapim tenderin publik, dhe pesta është teknologjia për të pasur një përparim për rritjen sa më shumë të mjediseve që ndihmojnë fëmijët dhe të rinjtë që hyjnë në këtë botë të re, vendosëm që anglishtja të nis që nga klasa e parë, do të nisim që prej këtij viti”, tha Rama.

Rama: PS parti e ndryshimit, jo pushtetit

Kryeministri Rama renditi disa nga arsyet se pse PS fitoi mandatin e tretë, pasi u pyet nga Papandreu.Për Ramën arsyet kryesore janë ndryshimi i vazhdueshëm i partisë dhe identifikimi i PS-së si pari e ndryshimit dhe jo e pushtetit. Ndërsa arsyeja tjetër lidhej me progresin që PS i kishte dhënë vendin gjatë kohës që ishte në pushtet.

“Jam mjaft i lumtur që pata mundësinë të vij dhe të ndaj me ju disa momente të këndshme., ne fituam mandatin e tretë dhe besoj se mbi të gjitha ja dolëm pasi gjatë gjithë kohës kemi luftuar që të mos bëhemi asnjë herë një parti që identifikohet me pushtetin, por të mbetemi në sytë e njerëzve që partia që identifikohet me ndryshimin. Për ta bërë këtë kemi luftuar gjatë gjithë kohës për të ndryshuar partinë tonë dhe të sjellim njerëz nga fusha të ndryshme të jetës. Tjera ka të bëjë me atë çfarë kemi bërë dhe mesa duket për njerëzit është e qarte se kjo është rruga drejt progresit dhe puna duhet përfunduar. Ka shumë gjëra që janë më mirë nga sa ishin, por ka gjëra të tjera që duhet të jenë më mirë. Jemi përpjekur të jemi përherë që mjaft të sinqertë me njerëzit dhe ta krahasojmë e atë që kemi bërë me atë çfarë duhet të bëjmë jemi larg. Po ta krahasojmë me atë që gjetëm dhe atë që bëmë, jemi të lumtur për t’u ndjerë të sigurt se kjo është rruga dhe të ecim përpara”, tha Rama.

Tags: be, dasme, Edi Rama, integrim