Një aksident në vendin e punës është shënuar në një karburant në Delvinë, ku një punonjës ka rënë nga lartësia teksa po montonte një tendë dielli. Ngjarja ndodhi ditën e djeshme dhe fatmirësisht punonjësi, një 44-vjeçar me inicialet D. P., ndodhet jashtë rrezikut për jetën, por i plagosur në spital.
Ngjarja ka sjellë pasoja edhe për pronarin e biznesit, një 65-vjeçar me inicialet M. B., banues në Fier. Policia e Vlorës njoftoi sot (4 korrik) se ndaj tij është nisur një procedim penal në gjendje të lirë për veprën penale "shkelja e rregullave të mbrojtjes në punë".
Sipas policisë, 44-vjeçari po punonte në montimin e tendës së diellit në ambientet e karburantit, kur humbi ekuilibrin dhe ra nga një lartësi. Rrethanat e plota të ngjarjes po hetohen.
