Një episod dramatik ndodhi në fundin e pjesës së parë të ndeshjes çerekfinale të Kupës së Botës për Klube, mes Bayern Munich dhe Paris Saint-Germain. Mesfushori i talentuar gjerman, Jamal Musiala, pësoi një dëmtim të rëndë në këmbën e majtë pas një përplasjeje me portierin e PSG-së, Gianluigi Donnarumma.
Në një moment të lojës, Donnarumma doli për të ndalur topin dhe u përplas me Musialan, duke i zënë kyçin e këmbës poshtë trupit të tij. Pamjet ishin të rënda dhe tronditëse. Portieri italian vuri menjëherë duart në fytyrë, i shqetësuar për dëmtimin, ndërsa Musiala qëndronte i shtrirë në fushë, duke ndjerë dhimbje të mëdha.
Stafi mjekësor ndërhyri menjëherë dhe lojtari u largua nga fusha me barelë. Pas rifillimit të lojës, tifozët filluan të fishkëllenin Donnarummën sa herë ai prekte topin, edhe pse përplasja nuk dukej e qëllimshme.
Bayern Munich pritet të japë një njoftim zyrtar për gjendjen e Musialas dhe për sa kohë ai mund të mungojë nga fusha. Tifozët e Bayern-it dhe gjithë bota e futbollit presin me ankth lajmet për gjendjen e tij.
