Fansat e Billie Eilish janë surprizuar nga një detaj që shumë nuk e kishin ditur më parë: të dy prindërit e këngëtares së famshme janë aktorë me karrierë në televizion dhe film.

Zbulimi ka ndezur rrjetet sociale, ku shumë kanë nisur të pyesin nëse Billie është një “nepo baby” – një term i përdorur për fëmijët e të famshmëve që arrijnë sukses në botën e artit.

Eilish, e cila u bë e njohur që në moshën 14-vjeçare dhe ka fituar çmime prestigjioze si Grammy, BRIT dhe Billboard Music Awards, është vajza e aktores Maggie Baird dhe aktorit Patrick O’Connell.

Nëna e saj, Maggie, ka luajtur në seriale të njohura si “Friends” (ku shfaqet në episodin e vitit 1999 “The One Where Joey Loses His Insurance”), “The X-Files”, “Six Feet Under” dhe “Bones”. Ajo ka qenë gjithashtu pjesë e filmit “An Innocent Man” në vitin 1989.

Ndërkohë, babai i saj, Patrick O’Connell, ka luajtur në “Iron Man” (2008), si dhe në serialet “The West Wing”, “Baskets” dhe “Hunter”.

Pasi ky fakt u përhap në internet, shumë fansa shprehën habinë e tyre. “Të dy prindërit e saj janë aktorë?!” shkruan një komentues në rrjet. Një tjetër pyet: “Pra, Billie është një nepo baby?”