Kreu i "Rithemelimit", Sali Berisha, teksa u pyet nga gazetarët në lidhje me kallëzimin e bërë nga ministri i Drejtësisë, Ulsi Manja për vrasje e katër qytetarëve në 21 janar të vitit 2011, është shprehur se, nuk dëshiron që të merret me “budallaqet” e tij.
Berisha tha se, nuk i druhet një arrestimi nga SPAK, pasi ai është një njeri pa imunitet.
“A ka mundësi të qëndrojmë tek çështja kryesore dhe mos merremi me budallaqet e Ulsiu, bodigard i Ramës. A ja vlen të merremi me të? Njeriu përgjegjës për ngjarjen është Rama. Nuk kam unë asnjë lloj… unë jam njeri pa imunitet siç e dini…. Pyetjet duhet të ishin për këtë çështje, si mundet media të heshtin para këtij superskandali?!”, tha Berisha, duke iu referuar arrestimit të zyrtarit të FBI-së.
Charles McGonigal u vendos në dy akuza për udhëtime me shpenzime të paguara në Tiranë, ku u takua me kryeministrin Edi Rama dhe për marrjen e një shume prej 225 mijë dollarësh nga një shqiptaro-amerikan.
Ai u akuzua se ka punuar për një oligark rus në shkelje të sanksioneve amerikane të vendosura në lidhje me luftën e Rusisë kundër Ukrainës. /Liberale.al
