Një incident tronditës ndodhi të martën në mëngjes, më 27 prill, në një fluturim të TUI nga Gran Canaria (Spanjë) për në Birmingham (Mbretëria e Bashkuar), ku një pasagjer i dehur shkaktoi panik dhe frikë të madhe në bord.

49-vjeçari Paul Self, në kundërshtim me urdhrat e ekuipazhit, refuzoi të ulej dhe të vendoste rripin e sigurimit ndërsa avioni përgatitej për ulje. Sipas dëshmive të pasagjerëve, ai u ngrit për të shkuar në tualet dhe më pas, në mënyrë të papritur, sulmoi fizikisht një asistente fluturimi duke e goditur me grusht në fytyrë.

Dëshmitarët okularë përshkruan skena kaotike brenda kabinës, me pasagjerë që bërtisnin, fëmijë që qanin dhe ekuipazhin që luftonte për të ndaluar burrin e dhunshëm. “Ishte një tmerr absolut”, deklaroi një pasagjer për gazetën The Sun.

Në momentet e fundit të zbritjes, Self nisi të bërtiste se “avioni do të rrëzohej”, duke shtuar më shumë panik mes udhëtarëve. Një anëtar i ekuipazhit u detyrua të ndërhynte me forcë, duke u bërtitur pasagjerëve: “Uluni të gjithë! Tani!”

Menjëherë pas uljes në Birmingham, oficerët e policisë hipën në avion dhe arrestuan Paul Self, i cili fillimisht u dorëzua vullnetarisht, duke thënë: “Më arrestoni”. Megjithatë, ai u përpoq të rezistonte më pas, por policët arritën ta prangosnin dhe ta largonin nga bordi, mes duartrokitjeve të lehtësuara të pasagjerëve.