Rusia ka kryer një sulm të madh me raketa dhe dronë në qytetin e Kievit, kryeqytetin e Ukrainës, duke shkaktuar viktima dhe shkatërrime të mëdha. Sipas autoriteteve ukrainase, të paktën 15 persona kanë humbur jetën dhe mbi 100 të tjerë janë plagosur.

Një nga dronët u përplas mbi një pallat banimi, duke shkatërruar shumë apartamente. Ministri i Brendshëm i Ukrainës bëri të ditur se gjatë këtij sulmi, Rusia ka përdorur 440 dronë dhe 32 raketa.

Presidenti i Ukrainës, Volodymyr Zelensky, e cilësoi këtë si “një nga sulmet më të tmerrshme” që nga fillimi i luftës.

Sulmi nisi natën dhe zgjati për më shumë se nëntë orë, duke detyruar banorët të kalojnë orë të tëra në strehimore nën tokë. Në një lagje të Kievit, një raketë balistike goditi një ndërtesë nëntëkatëshe, duke shkaktuar shembjen e saj pjesërisht.

Në total, 27 lagje të qytetit janë goditur. Një nga viktimat ishte një shtetas amerikan 62-vjeçar, sipas kryebashkiakut të qytetit, Vitali Klitschko.

Ministria e Mbrojtjes e Rusisë tha se kishte goditur objektiva ushtarako-industriale, por dëmet më të mëdha ranë mbi zonat civile. Autoritetet ukrainase paralajmërojnë se numri i viktimave mund të rritet, pasi kërkimet në rrënoja po vazhdojnë.