Të enjten në mëngjes, përfaqësues të bizneseve bllokuan për disa orë hyrjet kryesore të Prishtinës për të protestuar kundër liberalizimit të tregut të energjisë elektrike.

Protestuesit u vendosën në disa pika të rëndësishme si në Veternik, te rrethi i flamurit, afër qendrës Dukagjini, në rrugën për Fushë-Kosovë, Mitrovicë dhe Podujevë. Ata kundërshtojnë vendimin e Zyrës së Rregullatorit për Energji, i cili hyn në fuqi më 1 qershor.

Sipas këtij vendimi, bizneset e mëdha nuk do të furnizohen më me energji përmes tarifave të caktuara nga shteti, por duhet ta blejnë energjinë në treg të lirë. Nëse nuk e gjejnë vetë furnizuesin, do të kalojnë automatikisht në tregun e hapur, ku çmimet janë më të larta dhe të paqëndrueshme.

Ky ndryshim prek mbi 1.000 kompani që kanë më shumë se 50 punëtorë ose një qarkullim vjetor mbi 10 milionë euro. Këto kompani përdorin rreth 37% të energjisë elektrike në Kosovë.

Bizneset kërkojnë që ky vendim të shtyhet për një vit, pasi thonë se nuk janë bërë përgatitjet e duhura. Ata paralajmërojnë se çmimi i energjisë mund të rritet nga 220% deri në 270%, gjë që do të sjellë probleme të mëdha për punën e tyre.

Kreu i Odës Ekonomike, Lulzim Rafuna, tha se protestat nuk janë bërë me dëshirë, por si një mënyrë për të kërkuar një periudhë tranzicioni që do t’u jepte kohë bizneseve për t’u përgatitur.

Ligji për liberalizimin e tregut të energjisë është miratuar që në vitin 2016, por zbatimi i tij është shtyrë disa herë për shkak të situatave të ndryshme.