Futbolli argjentinas është tronditur nga lajmi i dhimbshëm për ndarjen nga jeta të mesfushorit të ri Camilo Nuin, vetëm 18 vjeç, i cili ndërroi jetë gjatë një operacioni të zakonshëm në gju.

Lajmin e ka konfirmuar klubi i tij, San Telmo, i cili njoftoi se Camilo po i nënshtrohej një ndërhyrjeje rutinë për dëmtime në menisk dhe ligamentin kryqëzor, në një klinikë në Buenos Aires. Ndërhyrja konsiderohej e zakonshme për sportistët, por fatkeqësisht mori një kthesë tragjike. Shkaqet e vdekjes nuk janë bërë ende të ditura, ndërsa autoritetet kanë nisur hetimet për të sqaruar çfarë ndodhi gjatë procedurës.

Në një deklaratë prekëse, klubi San Telmo shkroi:
“SAN TELMO NË ZI. Me hidhërim të thellë njoftojmë ndarjen nga jeta të Camilo Ernesto Nuin, një nga lojtarët tanë të rinj. Klubi do të qëndrojë i mbyllur gjatë ditës në shenjë zie. Jemi pranë familjes, miqve dhe shokëve të ekipit në këtë moment të vështirë.”

Camilo kishte qenë pjesë e San Telmo që nga viti 2022, ndërsa më parë ishte formuar në akademitë e dy klubeve të njohura argjentinase, Boca Juniors dhe Independiente, ku kishte luajtur mbi 80 ndeshje me ekipet e moshave.

Ngushëllime për humbjen e tij kanë ardhur edhe nga Shoqata e Futbollit Argjentinas (AFA), e cila në një deklaratë të saj shprehu hidhërim dhe solidaritet me familjen e lojtarit.

Camilo Nuin ishte një talent i ri me një të ardhme premtuese në futbollin profesionist. Vdekja e tij ka lënë një boshllëk të madh në zemrat e të gjithë atyre që e njihnin dhe e ndiqnin.