Le Scouarnec, ish-kirurgu 74-vjeçar, ka qenë në qendër të një ngjarje tronditëse që ka shokuar opinionin publik. Ai u dënua me 15 vjet burg në vitin 2020 për përdhunimin dhe sulmin seksual ndaj katër fëmijëve, përfshirë dy mbesat e tij. Kjo është vetëm pjesë e një historie të tmerrshme, pasi Le Scouarnec ka pranuar se ka abuzuar me 299 viktima gjatë një periudhe të gjatë, shumë prej tyre të sëmura ose të pavetëdijshme, pasi ishin nën anestezi.
Në gjykatë, ai qëndroi i qetë dhe pa emocione kur dëgjoi vendimin e gjyqtares Aude Burési. Le Scouarnec e pranoi fajin për këto krime dhe tregoi se kishte mbajtur ditarë ku shkruante për detaje grafike të sulmeve të tij, duke i mundësuar policisë të gjurmonte viktimat që nuk kishin kujtime për abuzimin. Ai tha se e dinte që ishte përgjegjës për vuajtjet e shumë fëmijëve dhe për vdekjen e dy viktimave që kishin kryer vetëvrasje për shkak të traumave që kishin përjetuar nga sulmet e tij.
“Nuk mund ta shoh më veten në të njëjtën mënyrë sepse jam pedofil dhe përdhunues fëmijësh”, tha Le Scouarnec gjatë deklaratave të tij të fundit në gjykatë javën e kaluar.
“Janë thënë shumë gjëra. Nuk i mbaj mend domosdoshmërisht të gjitha tani. Pa dyshim që do të më kujtohen kur të jem në qeli, por ajo që kam parë [në gjykatë] është vuajtja për të cilën jam përgjegjës”, tha ai.
Ai shtoi se as nuk donte dhe as nuk priste që të merrte ndonjë masë të butë.
Më herët këtë muaj, ai tha gjithashtu se ishte “përgjegjës” për vdekjen e dy viktimave, të afërmit e të cilave thonë se vdiqën nga vetëvrasja, pas traumës së sulmit seksual nga Le Scouarnec kur ishin fëmijë.
Gjyshërit e njërit prej tyre, Mathias Vinet, i cili vdiq katër vjet më parë, i treguan BBC-së për “zbritjen në ferr” që përjetoi nipi i tij kur policia i zbuloi se emri i tij shfaqej në një nga ditarët.
Gjyqi ka shkaktuar zemërim që Le Scouarnec i shpëtoi pa u ndëshkuar për abuzimin për më shumë se pesëmbëdhjetë vjet dhe se atij iu lejua të vazhdonte të trajtonte fëmijët pavarësisht një dënimi në vitin 2005 për shkarkimin e imazheve pedofile.
Grupi kolektiv i viktimave të Joel Le Scouarnec u ankua se gjyqi nuk kishte arritur të tërhiqte vëmendjen e politikanëve dhe shoqërisë në përgjithësi .
“Asnjë mësim nuk është nxjerrë nga kjo, as nga bota mjekësore dhe as nga politikanët”, tha grupi në një deklaratë. Disa viktima mbajtën një protestë para gjykatës përpara se të jepej vendimi të mërkurën pasdite.
Catherine, nëna e një viktime, tha ditën e shpalljes së vendimit se ishte hera e parë që kishte parë kaq shumë gazetarë që mbulonin gjyqin dhe shtoi se ndjente se viktimat ishin harruar.
“Është për të ardhur keq, por shpresa ime është që tani mesazhi ynë të mund të përçohet. Jo për brezin që është lënduar, por për nipërit e mbesat e mia”, tha ajo, duke shtuar se shpresonte që institucionet do të “reagojnë”.
Le Scouarnec, i cili ishte i pranishëm në gjykatë çdo ditë të gjyqit 14-javor, kërkoi falje vazhdimisht për veprimet e tij “të neveritshme”.
