Të rraskapitur dhe të revoltuar

Në prag të skadimit të afatit për kalimin e kufirit pa pasur me vete një test COVID-i, me mijëra emigrantë shqiptarë qëndruan sërish dje në radhë pavarësisht thirrjes së autoriteteve për t’u kthyer në shtëpi. Lehtësohet disi situate në mbëmje, ndërsa nga sot do të hyjnë në fuqi rregulla të reja, ku në Greqi do të lejohen që të kalojnë një numër i kufizuar i qytetarëve të pajisur me testin e COVID,  formularin e udhëtimit  dhe do të duhet të karantinohen për 7 ditë

Tensione u shënuan gjatë paradites të së dielës mes qytetarëve shqiptarë që prisnin në një radhë kilometrike në Pikën Kufitare të Kakavijës pas punës së ngadaltë në anën greke. Pasi autoritetet kufitare shqiptare ndërmjetësuan në mesditë, lëvizja e mjeteve rinisi me ritëm më të ngadaltë, ndërsa një radhë prej mbi pesë kilometrash ishte e pranishme në anën shqiptare të kufirit.

Herë pas here qytetarët shqiptarë u grumbulluan në pikën kufitare dhe u bënë thirrje autoriteteve të lehtësonin lëvizjen. Pika kufitare e Kakavijës në kufi me Greqinë, ndonëse punoi gjatë natës, arriti të përpunojë vetëm rreth 400 mjete dhe 1000 persona deri në orët e mesditës. Ministria shqiptare për Evropën dhe Punët e Jashtme njoftoi se mbi bazën e vendimeve të autoriteteve greke, nga e hëna datë 17 gusht, nga pika kufitare e Kakavijës do të lejohen të kalojnë në Greqi vetëm 750 persona në ditë, ndërsa nga pika e Kapshticës vetëm 300 persona në ditë, nga ora 6 e mëngjesit deri në orën 10 të mbrëmjes.

Kjo e ka rritur më shumë shqetësimin tek mijëra qytetarë shqiptarë që kanë rreth 48 orë në kufi. Emigrantët  u kërkuan autoriteteve shqiptare që të ndërmjetësojnë sërish me palën greke që pika kufitare të funksionojë edhe gjatë natës deri të hënën në mëngjes për të lejuar edhe ata emigrantë që presin për një periudhë të gjatë në radhë që të arrijnë të hyjnë në tokën greke. Radha kilometrike që një ditë më parë ishte drejt fshatit Jorgucat, tani është shkurtuar drejt zonës së Vriserasë, ndërkohë që në kufi nuk duket se vijnë më automjete te reja drejt Greqisë.

Por dje në mbrëmje gjandja dukej më e lehtësuar. Radha e automjeteve në pikën kufitare të Kakavijës u  ul ndjeshëm, ndërsa pritjes së gjatë të  shumë emigrantëve shqiptarë  po I vinte fundi. Deri në orën 22:00 pritej të kalonin të gjithë qytetarët.

 Meta

Presidenti Ilir Meta reagoi të dielën për situatën në Kakavijë përmes një postimi në rrjetet sociale, duke deklaruar se “qytetarët shqiptarë, të cilët prej ditësh ndodhen në pikën e kalimit kufitar të Kakavijës, në kushte tejet të vështira dhe në prag të një krize humanitare, nuk mund të trajtohen si njerëz pa Atdhe dhe pa shtet”. Presidenti i kërkoi qeverisë shqiptare “për të qëndruar pranë qytetarëve dhe për të marrë të gjitha masat, për informimin me transparencë, realizimin falas dhe, në vendin ku ndodhen, të tamponëve për COVID-19”. Presidenti Meta kërkoi edhe nga autoritetet greke, “që në respekt të frymës së fqinjësisë së mirë dhe lidhjeve të forta tradicionale mes dy popujve, të bëjnë të pamundurën për zgjidhjen e situatës, imazhet e së cilës turpërojnë të dyja vendet”.

Edhe Kryeministri Rama reagoi sot për situatën në Kakavijë përmes një deklarate të gjatë ku thuhet se “Natyrisht që askush s’mund të jetë as i lumtur, as i paacaruar nervash duke pritur në karvane sfilitës nën diellin përvëlues, për të kaluar kufirin. Por as koha që jetojmë nuk është aspak normale dhe pavarësisht shumëkujt që e konsideron Covidin një sajesë të oligarkisë botërore, Covidi jo vetëm ekziston, po edhe i ka futur shtetet në lloj-lloj spiralesh shqetësuese, në përpjekjen për ta përballur kanosjen e tij”, shkruajti zoti Rama. Sipas kryeministrit shqiptar, “Kakavija nuk është as ndonjë përjashtim në këtë kohë të mallkuar dhe as ka ndonjë lidhje me ndonjë qasje a sjellje antishqiptare të fqinjëve tanë”. Zoti Rama komentoi në deklaratën e tij e edhe humbjen e jetës së një 10 vjecari që u përplas të shtunën nga një autoambulancë në radhët kilometrike në anën shqiptare. “Humbja e jetës së fëmijës që i preu rrugën autoambulancës ishte një tragjedi e dhimbshme sa s’ka dhe ne nuk do të mjaftohemi thjesht me ngushëllimet e sinqerta me fjalë që as nuk gjenden dot, për atë familje të goditur nga ajo fatkeqësi e tmerrshme. Por nuk është gjëkundi as kjo një arsye për të urryer fqinjin apo mallkuar shtetin”, u shpreh Kryeministri Rama. Zoti Rama përsëriti angazhimin për ndihmën e qyetarëve që qëndrojnë në kufi: “asistencë përmes Forcave të Ushtrisë, Urgjencës Kombëtare, strukturave vendore, me gjithçka mundemi për njerëzit që po sfiliten në atë karvan rraskapitës dhe komunikim në vijimësi me palën greke në të gjitha nivelet – tanimë ata janë angazhuar me tre turne për të lehtësuar kalimin”, tha ai.

Opozita

Edhe Partia Demokratike e opozitës reagoi dje për situatën në kufirin shqiptaro-grek. Nëpërmjet një deklarate, Partia Demokratike shpreh “shqetësimin për të gjithë ata shqiptarë që po rraskapiten prej 5 ditësh në kufi, ku është krijuar një krizë e vërtetë humanitare” . Partia Demokratike tha se situata “është një krizë që tregon dështimin e qeverisë për të komunikuar me qytetarët e vet në këtë kohë kaq delikate dhe të rrezikshme për shëndetin. “Është e turpshme që as Edi Rama dhe asnjë nga ministrat e tij nuk ndërprenë pushimet, por vazhdojnë të relaksohen në resortet dhe vilat luksoze të bregut sipas një axhende që nuk ka asnjë lidhje me interesin e qytetarëve”, thotë Partia Demokratike në deklaratën e saj të bërë publike të dielën.

Ku mund të udhëtojnë shqiptarët dhe kushtet që duhet të plotësojnë 

Ministria për Evropën dhe Punët e Jashtme ka përpiluar një listë të gjatë, në të cilën tregon shtetet ku mund të udhëtojnë qytetarët shqiptarë dhe rregullat, që duhet t’i ndjekin. Euroneës Albania sjell për lexuesit detajet dhe informacionet thelbësore në lidhje me udhëtimet e shqiptarëve drejt vendeve të tjera;

Greqi- Qytetarët shqiptarë me pasaportë shqiptare nuk mund të udhëtojnë drejt Greqisë deri në datën 31 gusht. Gjithashtu, në fluturimet nga Tirana në Athinë kërkohet test negativ i Covid (nga data 7-31 gusht), ndërsa në kufirin tokësor (Kakavijë dhe Kapshticë) testi negativ do të kërkohet duke filluar nga data 17 gusht.

Itali- Sipas një dekreti të qeverisë italiane, të hyrë në fuqi më 12 gusht, parashikohet se, për udhëtarët që hyjnë nga Malta, Spanja, Greqia dhe Kroacia, duhet me patjetër pasja e testit negativ për Covid-19. Shqipëria nuk është e listuar në këtë dekret, ndërsa autoritetet kanë vendosur që udhëtarëve t’ua kryejnë falas tamponin në momentin e mbërritjes në aeroport.

Përgjigja e tamponit do jetë gati për 48 orë. Të gjithë udhëtarët që vijnë nga vende që nuk janë të përfshira në dekret, përfshirë edhe shqiptarët, do jenë të detyruar të karantinohen deri sa t’u komunikohet rezultati i testit të COVID-19.

Gjermani- Sipas Ministrisë së Jashtme të Gjermanisë, pas hyrjes në këtë shtet nga një zonë rreziku, në të cilën përfshihet edhe Shqipëria, udhëtarët  duhet të ndjekin këto rregulla.

• Vazhdojnë direkt në destinacionin e tyre pas hyrjes në Gjermani
• Izolohen në shtëpi ose në një akomodim të përshtatshëm
• Me e-mail ose telefon të njoftojnë autoritetin kompetent, si rregull, Ministrinë e Shëndetësisë në zonën e vendbanimit/ akomodimit në landin përkatës.

Autoritetet gjermane kanë njoftuar se shumë shpejt kushdo që arrin në Gjermani nga një zonë rreziku do t’i kërkohet t’i nënshtrohet testit të COVID-19. Por, kjo masë mund të ndryshojë nga Landi në Land, ndaj udhëtarët duhet të kontrollojnë faqet zyrtare për t’u njohur me informacionet e fundit.

Spanjë- Shtetasit shqiptarë mund të udhëtojnë për në Spanjë, por me disa rregulla. Ata duhet t’u përmbahen kritereve të mëposhtme, ndërsa deri tani, ky shtet nuk aplikon regjim karantine për qytetarët shqiptarë:

• Kur kanë leje qëndrimi të vlefshme
• Kur kanë arsye esenciale, të cilat justifikojnë qëllimin e ardhjes

Mbretëri e Bashkuar dhe Irlandë– Në këto dy shtete mund të hyjnë nga Shqipëria shtetasit e këtyre vendeve (Irlandë dhe MB) dhe të gjithë shtetasit e tjerë, përfshirë ata shqiptarë, të cilët kanë leje qëndrimi në këto vende. Por, ndryshe nga disa shtete të tjera, Mbretëria e Bashkuara dhe Irlanda aplikojnë masën e karantinës dy javore.

Zvicër– Aktualisht shtetasve shqiptarë nuk u lejohet lëvizja, me përjashtim të rasteve të veçanta si: emergjencat shëndetësore, familjarë të shtetasve zviceranë apo atyre me rezidencë në Zvicër.

Ndryshe paraqiten rregullat për ata persona, të cilët kanë të drejtë udhëtimi në Zvicër.  Kjo kategori, e cila mund të këtë qenë në Shqipëri për arsye pune apo për turizëm, nuk e ka për detyrë t’i nënshtrohet regjimit të karantinës.

Austri-Momentalisht shtetasit shqiptarë nuk mund të udhëtojnë drejt Austrisë dhe situata nuk premton për një rihpaje të shpejtë. Austria lejon transitin si dhe udhëtimin e shtetasve shqiptarë që janë të pajisur dhe kanë leje qëndrimi në Austri ose në një nga vendet Shengen (por jo nëse vijnë nga Suedia, Spanja, Portugalia).

Sipas MEPJ-së së Shqipërisë, shtetet si Franca dhe Portugalia nuk lejojnë udhëtimin drejt tyre të shtetasve shqiptarë të cilët nuk janë të pajisur me vizë D të vlefshme apo me leje qëndrimi në këto 2 vende. Nga kjo masë bëjnë përjashtim vetëm diplomatët, vizitat zyrtare dhe punonjësit e transportit apo stafet mjekësore dhe ato humanitare.

Mali i Zi- Në këtë vend shqiptarët mund të hyjnë duke paraqitur testin negativ të COVID-19, jo më të vjetër se 48 orë.

Në Kosovë dhe në Maqedoninë e Veriut shqiptarët mund të udhëtojnë pa asnjë detyrim karantinimi apo testi negativ për Covid-19.

Kushtet që çdo qytetar duhet të plotësojë për të kaluar pikën doganore dhe për t’u futur në Greqi nga e hëna
– Testin negativ të COVID-19 (RT-PCR), i cili duhet të jetë kryer deri 72 orë para mbërritjes në pikën e kalimit kufitar, nga laboratorët publike apo private të certifikuara në Shqipëri. Ky rregull nuk vlen për shoferët e kamionëve që transportojnë mallra dhe fëmijët nën 10 vjeç.
– Vërtetimin diagnozë të përkthyer në anglisht, në të cilin duhet të jenë të shënuara emri, mbiemri dhe numri i pasaportës/numri i kartës së identitetit të individit.
– Vërtetimin e plotësimit të formularit të posaçëm PLF, me kodin QR (nga adresa elektronike https://travel.gov.gr).
– Testi i COVID-19 (RT-PCR) është i vlefshëm vetëm nga laboratoret e linçesuar nga Ministria e Shëndetësisë dhe Mbrojtjes Sociale, të cilat mund t’i gjeni në faqen zyrtare. /Gazeta Liberale

Tags: COVID, qytetaret, udhetim