Presidentja e Kosovës, Vjosa Osmani, ka pritur sot në takim dy deputetë nga Parlamenti i Mbretërisë së Bashkuar, Martin Vickers dhe Paul Foster. Të dy janë përfaqësues të grupeve që mbështesin miqësinë me Kosovën në Parlamentin britanik.
Sipas një njoftimi nga Presidenca, gjatë takimit u fol për marrëdhëniet shumë të mira mes Kosovës dhe Britanisë së Madhe, si dhe për mënyrat se si këto marrëdhënie mund të forcohen edhe më shumë. Temat kryesore të diskutimit ishin bashkëpunimi ekonomik dhe në fushën e mbrojtjes, përkrahja për Kosovën në arenën ndërkombëtare dhe mbështetja për rrugën euroatlantike të vendit.
Presidentja Osmani i falënderoi deputetët britanikë për përkrahjen e tyre të vazhdueshme ndaj Kosovës dhe theksoi se partneriteti ndërmjet dy vendeve është shumë i rëndësishëm për të ardhmen.
Deputeti Martin Vickers, i cili udhëheq Grupin Ndërpartiak për Kosovën dhe Shqipërinë, dhe deputeti Paul Foster, nënkryetar i “Labour Friends of Kosovo”, riafirmuan mbështetjen e tyre të fuqishme për popullin dhe shtetin e Kosovës.
