Aeroporti Ndërkombëtar “Nënë Tereza” ka lëshuar një njoftim të rëndësishëm për pasagjerët që planifikojnë të udhëtojnë më 15 dhe 16 maj 2025. Për shkak të Samitit të Komunitetit Politik Europian që do të mbahet në Tiranë gjatë këtyre datave, me pjesëmarrjen e liderëve nga e gjithë Europa, priten masa të rrepta sigurie dhe bllokime të rrugëve. Kjo mund të shkaktojë vonesa dhe trafik të rënduar në hyrje dhe dalje të qytetit.

Për të shmangur çdo shqetësim dhe për të siguruar një udhëtim të qetë, TIA rekomandon që pasagjerët të paraqiten në aeroport të paktën 3 orë para fluturimit. Kjo kohë shtesë do t’u mundësojë përfundimin e të gjitha procedurave të kontrollit dhe të kalimit të sigurisë pa nxitim.

Këshilla për udhëtarët:

·         Planifikoni paraprakisht: Kontrolloni oraret e fluturimeve dhe sigurohuni që të keni të gjitha dokumentet e nevojshme.

·         Arrini herët: Për shkak të masave të sigurisë dhe mundësisë së vonesave, është e rekomandueshme të arrini në aeroport më herët se zakonisht.

·         Informohuni për trafikun: Kontrolloni informacionet për bllokimet e mundshme të rrugëve dhe planifikoni rrugën më të përshtatshme për në aeroport.