Vetëm dy javë përpara finales që do të zhvillohet më 31 Maj në Allianz Arena trofeu i Champions League mbërrin në Mynih.
Tifozët vërshuan të bënin fotografi me trofeun, që ndryshe njihet si “Kupa me veshë të mëdhenj”.
Entuziazmi ishte i madh, edhe sepse finalja e turneut më të rëndësishëm kontinental për klube kthehet në kryeqendrën e Bavarisë për herë të parë prej vitit 2012.
“Është shumë bukur që erdhi trofeu. Është kaq i shndritshëm dhe është fantastike ta shoh nga afër.”
“E ndjek futbollin, shumë lojtarë e kanë fituar këtë kupë. Është e pabesueshme, ky trofe vlen kaq shumë, prandaj nuk të lejojnë ta prekësh.”
“Në një farë mënyre, trofeu bëhet i prekshëm dhe është kaq afër. Nuk kam parë ekspozita të tilla dhe jam e befasuar.”
Paris Saint Germain do të sfidojë Interin në finale. Francezët kërkojnë triumfin e parë historik, ndërsa zikaltërit kurorën e katërt të kampionit të Europës.
