Piktura më lart e titulluar “Shtëpia e dëshmorit Ndoc Mazi” është realizuar nga Simon Rrota i cili paraqet një skenë të qetë rrugice, ku një grua me veshje tradicionale shqiptare ndodhet pranë portës së Ndoc Mazit.
Ky i fundit ishte një atdhetar dhe dëshmor i kombit shqiptar, i cili dha jetën për lirinë e vendit. Përmes kësaj vepre, Rrota nderon kujtimin e tij duke përjetësuar shtëpinë si një vend të gjallë historie dhe krenarie.
Simon Rrota u lind në vitin 1887 në Shkodër.
Studimet e larta i kreu në Akademinë e Arteve të Bukura në Milano. Aty u njoh dhe u ndikua nga teknikat e Rafaello-s dhe Caravaggio-s.
Pas kthimit në Shqipëri, do të punonte fillimisht si fotograf në Lushnjë, për t’u profilizuar gjatë gjithë trajektores së tij profesionale deri në daljen në pension, si mësues në gjimnazin shtetëror të vendlindjes së tij.
I pandashëm nga piktura, do të merrte pjesë në disa ekspozita në rang vendi, si dhe në disa aktivitete të kësaj natyre në nivel ndërkombëtar, ku u pohua autenticiteti i krijimtarisë së tij.
Tipikisht, si një artist i periudhës së Rilindjes, vepra e tij karakterizohet nga ndjenjat patriotike. Pas çlirimit nga zgjedha turke, artisti do të mishëronte heroin kombëtar, Gjergj Kastriot Skënderbeun, në përleshje me pushtuesit në tablonë “Beteja e Skënderbeut” (1916), si edhe në kompozimin e njohur “Skënderbeu në shtratin e vdekjes”.
Mes pikturave të tij, veçohen për popullaritet më të madh punimet “Te Pusi i fshatit” (1934) dhe “Portë në Shkodër” (1936). “Piktor i Merituar” (1961) dhe “Piktor i Popullit” (1999) ishin titujt postumë me të cilët u nderua Rrota. Ai vdiq në vitin 1961.