Më shumë se 100 persona kanë humbur jetën, mes tyre 28 fëmijë, pas një përmbytjeje shkatërruese që goditi Teksasin brenda pak orësh. Lumi Guadalupe u rrit me plot 8 metra për më pak se një orë, duke marrë me vete shtëpi, makina dhe jetë njerëzish, e duke shkatërruar komunitete të tëra.

Tragjedia, që ka tronditur opinionin publik, nuk është parë thjesht si një fatkeqësi natyrore, por si një dështim i thellë i autoriteteve. Profesori i njohur Costas Synolakis, në një analizë për Wall Street Journal, thekson se “nuk ishte natyra ajo që vrau, por mungesa e përgjegjësisë”.

Sipas tij, paralajmërimet ishin dhënë me kohë, por munguan sirenat, sistemet e informimit dhe vullneti politik për të vepruar. “Shkenca bëri punën e saj. Ishte politika ajo që dështoi,” shkruan Synolakis.

Ai thotë se zyrtarët lokalë ishin në dijeni të rrezikut për vite me radhë, por nuk ndërmorën masa, duke e vënë më shumë theksin te shqetësimet për ndotjen akustike sesa për sigurinë e qytetarëve.

“Fëmijët në kamp nuk u mbytën nga uji, por nga dështimi i imagjinatës dhe përgjegjësisë,” përfundon ai, duke bërë thirrje që të mësohet nga kjo tragjedi, për të parandaluar të tjera që mund të vijnë.