Një ngjarje e rëndë ka ndodhur në Palermo të Italisë, ku një vajzë e mitur ka ndërruar jetë pak pasi ishte dërguar me urgjencë në spital. Vajza, e shoqëruar nga nëna dhe partneri i saj, nuk arriti t’i mbijetonte gjendjes së rënduar shëndetësore.

Sipas hetimeve paraprake, ajo vuante nga epilepsi e rëndë, ishte e paralizuar dhe kishte probleme serioze neurologjike. Megjithatë, për shkak të rrethanave të paqarta të vdekjes, autoritetet kanë urdhëruar autopsinë për të sqaruar shkaqet e sakta.

Aktualisht, dosja është klasifikuar si “akte që nuk përbëjnë krim”, por Policia ka nisur hetimet dhe ka sekuestruar banesën ku jetonte familja, si dhe një shishe të vogël me benzinë të gjetur brenda saj. Fqinjët nuk kanë raportuar ndonjë ngjarje të dyshimtë në zonë.

Nëna e vajzës, një 31-vjeçare me katër fëmijë, dhe partneri i saj janë marrë në pyetje nga autoritetet. Babai biologjik i vajzës është njoftuar dhe ka mbërritur në spital pas ngjarjes.

Ndërkohë, fëmijët e tjerë të gruas janë vendosur përkohësisht në një shtëpi kujdestare, me urdhër të Prokurorisë për të Mitur, derisa të sqarohen plotësisht të gjitha rrethanat e ngjarjes tragjike.

Hetimet po vazhdojnë dhe pritet që dëshmitë e fqinjëve dhe rezultatet e autopsisë të japin më shumë dritë mbi këtë rast të ndjeshëm.