Ish-presidenti amerikan Donald Trump ka ngritur një tjetër akuzë të bujshme, këtë herë në drejtim të këngëtares së njohur Beyoncé, duke pretenduar se ajo ka marrë 11 milionë dollarë për të mbështetur Kamala Harris në një event elektoral gjatë fushatës së vitit 2024.
Trump kërkoi ndjekje penale ndaj Beyoncé, duke e quajtur këtë pagesë të supozuar si një shkelje të ligjit elektoral. Megjithatë, deri tani nuk ekziston asnjë provë që këngëtarja të ketë përfituar ndonjë shumë të tillë.
Sipas dokumenteve zyrtare të fushatës së Kamala Harris, është regjistruar vetëm një pagesë prej 165 mijë dollarësh, e cila ka shkuar për shpenzime teknike dhe prodhimi të eventit dhe jo për ndonjë pagesë ndaj Beyoncé.
Fushata e Harris dhe përfaqësuesit zyrtarë të Beyoncé kanë mohuar në mënyrë kategorike çdo pagesë për mbështetje politike. Ata e kanë cilësuar deklaratën e Trump si të pavërtetë dhe pa asnjë bazë ligjore apo faktike.
