Gjykata Ndërkombëtare Penale (GJNP) ka lëshuar fletarrestime për dy udhëheqës të lartë të talibanëve në Afganistan, përfshirë liderin shpirtëror të tyre, Haibatullah Akhundzada.

Ai dhe Abdul Hakim Haqqani, i cili është shefi i drejtësisë në qeverinë e talibanëve, akuzohen për krime kundër njerëzimit. Sipas gjykatës, ata kanë persekutuar gra dhe vajza vetëm për shkak të gjinisë së tyre, duke u mohuar të drejta bazë si arsimi, lëvizja e lirë, e drejta për të shprehur mendimin apo për të ndjekur fenë e tyre.

Në një deklaratë zyrtare, GJNP tha se që nga 15 gushti 2021 – kur talibanët morën pushtetin në Afganistan – e deri më 20 janar 2025, këta liderë kanë drejtuar një sistem që ka synuar gratë, vajzat dhe persona të tjerë që nuk janë pajtuar me politikat e tyre rreth gjinisë dhe identitetit gjinor.

"Gratë dhe vajzat janë përballur me ndalesa të rënda që nuk i kanë prekur burrat në të njëjtën mënyrë. Ky diskriminim është bazuar vetëm në faktin që janë femra", tha Gjykata.

Përveç kësaj, janë shënjestruar edhe persona të tjerë që kanë shprehur identitet apo seksualitet që nuk përputhet me ideologjinë e talibanëve.

Gjykata Ndërkombëtare Penale është e vendosur në Hagë dhe merret me gjykimin e krimeve më të rënda, si krimet e luftës dhe ato kundër njerëzimit. Ajo nuk ka policinë e vet, prandaj varet nga vendet anëtare që të arrestojnë personat për të cilët ka lëshuar fletarrestime.