Autoriteti Italian i Konkurrencës (AGCM) ka gjobitur kompaninë e njohur të modës “Shein” me 1 milion euro, duke e akuzuar për mashtrim ndaj konsumatorëve në lidhje me ndikimin mjedisor të produkteve të saj.
Hetimi, i nisur në shtator të vitit të kaluar, zbuloi se mesazhet e Shein mbi qëndrueshmërinë mjedisore dhe përgjegjësinë sociale ishin të paqarta dhe në disa raste mashtruese. AGCM tha se pretendimet për riciklim dhe dizajn miqësor ndaj mjedisit në linjën “evoluSHEIN by design” ishin të ekzagjeruara dhe krijonin një imazh të rremë për klientët.
Gjobën e mori kompania “Infinite Styles Services Co. Limited”, me seli në Dublin, e cila menaxhon aktivitetet e Shein në Evropë.
Kjo është gjoba e dytë për Shein në Evropë brenda pak javësh. Në fillim të korrikut, autoritetet franceze e ndëshkuan me 40 milionë euro për ulje çmimesh dhe pretendime të rreme mjedisore.
Shein ka deklaruar se ka bashkëpunuar me autoritetet dhe po ndërmerr hapa për të përmirësuar komunikimin me konsumatorët dhe praktikat e saj mjedisore.
