Një ngjarje makabre ka tronditur opinionin publik në Itali, ku një nënë dhe partnerja e djalit të saj janë arrestuar për vrasjen e 35-vjeçarit Alessandro Venier. Krimi, i ndodhur më 25 korrik, ka shokuar komunitetin lokal për shkak të detajeve të rënda dhe motiveve të dhimbshme që qëndrojnë pas tij.

E ëma e viktimës, 62-vjeçarja Lorena Venier, ka pranuar autorësinë në një rrëfim tronditës para hetuesve, duke deklaruar se bashkëpunoi me partneren kolumbiane të djalit, Maylin Castro Monsaldo, për të ndaluar një cikël dhune që kishte marrë përmasa të rrezikshme.

Sipas mediave italiane, Maylin, nëna e një foshnje të lindur në janar, jetonte nën frikën e përhershme të dhunës fizike dhe psikologjike nga partneri i saj. E lodhur dhe në depresion, ajo kërkoi ndihmën e Lorena-s, e cila tha se veproi nga frika dhe dëshira për ta mbrojtur atë. “Ishte vajza që nuk pata kurrë,” u shpreh ajo në dëshminë e saj.

Plani nisi me drogimin e Alessandro-s përmes një ilaçi të tretur në limonadë, më pas një injeksion insuline që e bëri të pavetëdijshëm. Fillimisht tentuan ta mbytnin me duar, por vrasja u krye përfundimisht nga Maylin me lidhëse këpucësh.

Trupi i pajetë u copëtua dhe u vendos në një kosh plehrash në garazh, ku u mbulua me gëlqere të blerë online, një përpjekje për të zhdukur gjurmët.

Hetimet zbuluan se Alessandro kishte precedentë penalë për dhunë në familje dhe probleme me drogën. Tragjedia e familjes Venier është kthyer në një nga ngjarjet më të errëta në historinë e komunitetit, duke hapur debat mbi dhunën në familje dhe mungesën e rrugëve të mbrojtjes për viktimat.