Franca në Europë dhe Japonia në Azi janë dy shembuj nga vendet e mëdha e të zhvilluara në dy kontinente të ndryshme e të populluara që kanë vendosur për të rritur numrin e studentëve ndërkombëtarë, gjatë pesë viteve të ardhshme. Edhe pse janë dy ndër 10 vendet më të zhvilluara në botë dhe të lakmuara nga emigrantët, universitetet e tyre, si në Francë ashtu edhe në Japoni, po u gëzohen politikave të posaçme që po ndiqen nga qeveritë për të përmbushur objektivin e tërheqjes së një numri sa më të lartë të studentëve.   

Shembulli i parë është Franca e cila po kërkon të forcojë lidhjet arsimore me Indinë duke synuar të mirëpresë 30,000 studentë indianë deri në vitin 2030, një rritje e ndjeshme nga 8,000 të regjistruarit për vitin akademik 2023-24. Ky qëllim, i deklaruar nga ambasadori francez Thierry Mathou është pjesë e një plani më të gjerë për të thelluar lidhjet në kuadër të partneritetit strategjik Indi-Francë.

Sipas raportit të Times of India, për të mbështetur këtë iniciativë, Franca ka prezantuar masa të përshtatura për të tërhequr studentët indianë. Këto përfshijnë "klasa ndërkombëtare" speciale njëvjeçare në 35 universitete franceze. Programi është hartuar për studentët indianë që përfundojnë shkollën e mesme dhe përfshin trajnim intensiv në gjuhën frënge së bashku me kurse hyrëse në fushën e tyre të zgjedhur të studimit.

Autoritetet thanë se kjo qasje është unike për Indinë dhe nuk shtrihet tek studentët nga vende të tjera. "Kjo do të thotë që pas një viti, nuk do të ketë problem me gjuhën", tha zyrtari për TOI-n. Shkollat ​​e biznesit në Francë, shumë prej të cilave ofrojnë programe tërësisht në anglisht, kanë njohur një rritje të regjistrimeve indiane - aktualisht kombësia e huaj kryesore në këto institucione.

Qeveria franceze u shpreh se nuk synon të tërheqë një numër të madh studentësh, por është më tepër e interesuar te cilësia. “Ne duam të tërheqim më të mirët. Dhe duam që këta studentë të kthehen në Indi”, shtoi ai, duke shtuar se lëvizshmëria e studentëve shihet si një zgjatim i partneritetit strategjik.  Përveç mundësive akademike, të diplomuarit indianë që kthehen në atdhe do të gjejnë perspektiva pune me kompanitë franceze që tashmë operojnë në Indi. Franca aktualisht ka rreth 800 kompani në Indi, që punësojnë mbi 500,000 indianë.

Një shembull tjetër është Japonia. Ky vend po ecën me hapa të qëndrueshëm drejt qëllimit të saj afatgjatë për të pritur 400,000 studentë ndërkombëtarë deri në vitin 2033. Që nga maji i vitit 2024, vendi i zhvilluar aziatik kishte tejkaluar pikën e parë të objektivit dhe tejkalimit të standardit para pandemisë prej 312,000 studentësh tre vjet përpara afatit, sipas një raporti nga ICEF Monitor.

Sipas të dhënave nga Organizata e Shërbimeve për Studentët në Japoni (JASSO), aktualisht ndodhen 336,708 studentë ndërkombëtarë në Japoni. Shifra shënon një rritje prej 21% nga viti i kaluar dhe e pozicionon Japoninë në rrugën e duhur për të përmbushur objektivin e saj, atë të vitit 2033.

Shumica e studentëve (96%) financohen vetë, ndërsa të tjerët marrin bursa nga qeveria japoneze ose qeveritë e huaja. Institucionet e arsimit të lartë, pra universitetet, përbëjnë 68% të regjistrimeve, kurse shkollat ​​në  gjuhën japoneze përbëjnë 32% të mbetur.

Mes të regjistruarve në arsimin e lartë (229,467 studentë), 40% janë në programe universitare, 25% ndjekin studime pasuniversitare, 33% ndjekin kolegje të trajnimit profesional dhe 2% janë në kurse përgatitore universitare.

Shumica e studentëve ndërkombëtarë në Japoni vijnë nga vende të tjera aziatike. Në vitin 2024, 92.5% e studentëve erdhën nga rajoni më afërt, Kina, Nepali, Vietnami, Myanmari dhe Korenë e Jugut që përbënin gati 80% të regjistrimeve totale. Nepali njohu një rritje veçanërisht të fortë, prej 70% të numrit të studentëve nga viti në vit.

Rajonet urbane të Japonisë mbeten destinacionet kryesore. Prefekturat Kanto dhe Kinki, të cilat përfshijnë Tokion dhe Osakë, pritën më shumë se 75% të popullsisë studentore ndërkombëtare.

Nga ana akademike, 70% e studentëve ndërkombëtarë studionin shkenca humane ose shoqërore, ndërsa 14% ishin të regjistruar në programe shkencore ose inxhinierike. Politika arsimore e Japonisë vazhdon të japë përparësi angazhimit global dhe shifrat aktuale të regjistrimeve pasqyrojnë interesin dhe aksesin në rritje për studentët nga e gjithë Azia.