Erblin Jaku
Mbretëria e Bashkuar po bëhet një destinacion gjithnjë e më pak i arritshëm për emigrantët, sipas të dhënave të fundit qeveritare që tregojnë një rënie të konsiderueshme të emigracionit neto*. Gjatë vitit të fundit, emigracioni neto në Mbretërinë e Bashkuar ra me 20%, duke arritur një total prej 728,000 personash që emigruan në vend gjatë kësaj periudhe. Kjo rënie i atribuohet politikave gjithnjë e më të ashpra të emigracionit dhe një mjedisi më sfidues për ata që kërkojnë të vendosen atje.
Qeveria britanike ka zbatuar masa më të rrepta për të kufizuar emigracionin, duke u fokusuar veçanërisht në rrugët e paligjshme dhe forcimin e sigurisë kufitare. Këto politika pasojnë rritjen e presiont publik dhe politik për të menaxhuar më mirë numrin e emigrantëve. Si rezultat, rrugët për shqiptarët që dëshirojnë të emigrojnë në Mbretërinë e Bashkuar janë bërë ndjeshëm më të vështira.
Për ata që ende e konsiderojnë, panorama ekonomike dhe sociale e Mbretërisë së Bashkuar paraqet gjithashtu sfida të mëdha. Kostoja e lartë e jetesës, vështirësitë për gjetjen e një akomodomi dhe mundësitë shumë të kufizuara për punëtorët e pakulaifikuar e bëjnëAnglinë një vend aspak tërheqës. Së bashku me kërkesat më të rrepta për marrjen e një vize dhe përpjekjet e vazhdueshme për të reduktuar emigracionin, këta faktorë e bëjnë Mbretërinë e Bashkuar një destinacion më pak të favorshëm krahasuar me vendet e tjera evropiane.
Statistikat e fundit ilustrojnë më tej vështirësitë me të cilat përballen emigrantët. Gjatë vitit që përfundoi në shtator 2024, mbërritjet e parregullta në Mbretërinë e Bashkuar arritën në 36,949 persona, një rënie prej 18% krahasuar me vitin e kaluar. Kalimet me varka të vogla përbënin 29,851 nga këto mbërritje, që përfaqësonin 81% të totalit dhe një rënie prej 21% krahasuar me vitin e kaluar. Mes të ardhurve me varka të vogla, afganët dhe vietnamezët ishin kombësitë më të zakonshme. Ndërsa numri i të ardhurve afganë ra me 14% krahasuar me të njëjtën periudhë në 2023, mbërritjet nga Vietnami u rritën me 177%. Për më tepër, 28% e individëve që kërkuan azil në Mbretërinë e Bashkuar gjatë kësaj periudhe kishin arritur përmes varkave të vogla. Shqiptarët nuk janë më pjesë e këtyre statistikave por fatkeqësisht media vazhdon t’i targetojë ata.
Raportet sugjerojnë se Mbretëria e Bashkuar po humbet atraktivitetin si një destinacion emigrimi, ndërsa emigrantët potencialë po preferojnë gjithnjë e më shumë vende që ofrojnë kushte më të favorshme për punë dhe integrim. Në dritën e politikave më të rrepta dhe mundësive më të pakta, ata që mendojnë të ëmigrojnë këshillohen të shqyrtojnë alternativa që përputhen më mirë me aspiratat dhe qëndrueshmërinë e tyre afatgjatë.
Rreziqet e lidhura me përpjekjen për të arritur në Mbretërinë e Bashkuar, veçanërisht përmes mënyrave të parregullta, shpesh tejkalojnë përfitimet e mundshme. Të rinjtë duhet të kërkojnë mundësi zhvillimi dhe suksesi brenda Shqipërisë ose të eksplorojnë vende që ofrojnë rrugë më të arritshme për një të ardhme më të mirë.
*Emigracioni neto është diferenca midis numrit të emigrantëve qëkanë ardhur dhe emigrantëve që janë larguar nga vendi në një periudhë të caktuar kohe, zakonisht një vit.
