Moti i ngrohtë dhe me diell ka sjellë këtë fundjavë një fluks të lartë vizitorësh në bregdetin e Shëngjinit. Qindra qytetarë nga zona të ndryshme të vendit dhe nga Kosova kanë zgjedhur plazhin për të kaluar ditët e para të majit në relaks dhe qetësi.
Edhe pse sezoni turistik nuk është hapur zyrtarisht, vijat bregdetare janë mbushur me pushues, ndërsa operatorët turistikë kanë nisur përgatitjet për pritjen e sezonit veror. Pastërtia e bregdetit dhe çmimet ende të ulëta janë faktorë që kanë tërhequr vizitorët.
Shëngjini pritet të jetë sërish një nga destinacionet kryesore të verës, duke nisur me një fundjavë optimiste për sektorin e turizmit.
