Ndërsa Italia dërgoi grupin e parë të azilkërkuesve në Shqipëri të mërkurën, sipas një marrëveshjeje të re midis Romës dhe Tiranës, një restorant në qytetin port ku ata mbërritën gjeti shkak për festë.
'Trattoria Meloni' në Shëngjin është një odë shumëngjyrëshe për kryeministren italiane, Giorgia Meloni, pavarësisht polemikave rreth marrëveshjes që parashikon që Shqipëria të strehojë emigrantët në emër të Italisë, ndërsa kërkesat e tyre për azil janë duke u përpunuar.
"Unë e dua Melonin. E dua, sepse Meloni është i vetmi zë në Evropë që thotë të vërtetën, prandaj e dua", tha pronari i restorantit Gjergj Luca.
Muret e restorantit janë të mbuluara me dhjetëra piktura të Melonit, realizuar nga artisti shqiptar Helidon Haliti. Në njërën ajo përqafon kryeministrin shqiptar, Edi Rama. Në një tjetër ajo me vathë të mëdhenj sheh drejt qiellit, si në lutje.
“Më shumë se 20 vjet më parë nga ky port shqiptarët u arratisën për t’u integruar në Itali dhe tani ne po i kthejmë Italisë një borxh shumë modest për atë që na bëri”, tha Luca.
Ai i referohej pranimit të shqiptarëve nga Italia në vitin 1997, të cilët po iknin nga dhuna në shtëpi që kishte lënë mijëra të vdekur në mes të trazirave sociale dhe ekonomike pas rënies së komunizmit.
Fabrizio Righetto, një pensionist nga Italia që tashmë jeton në Shqipëri, shkoi në restorant të mërkurën. Ai vlerësoi lideren e djathtë të vendit të tij.
"Në Itali tashmë mund të shihni se çfarë bëri Meloni. Ajo ka rikthyer demokracinë, një demokraci të fortë," tha ai.
Italia ka ndërtuar dy qendra pritëse në Shqipëri në skemën e parë nga një vend i Bashkimit Evropian për të devijuar emigrantët drejt një shteti jashtë BE-së, ndërkohë që kërkesat e tyre për azil do të trajtohen në vendin tonë.
Plani synon të pengojë ardhjet e parregullta në Itali, por është kritikuar nga grupet e të drejtave të njeriut që thonë se kufizon të drejtat e emigrantëve për azil. Shumë banorë në Shëngjin shpresojnë se marrëveshja do të nxiste ekonominë lokale - duke krijuar më shumë vende pune dhe më shumë biznes për fermerët vendas që do të jenë në gjendje të furnizojnë kampet.
