Frika dhe pasiguria kanë pllakosur Vushtrrinë. Rrugët duken më të heshtura se zakonisht, ndërsa banorët flasin me zë të ulët për ngjarjet tronditëse.
“Nuk e prisja kështu. E shihja lajmin në portale dhe nuk mund të besoja”, thotë mes lotësh 19-vjeçari Alaudin Haradini.
Nëna e tij 42 vjeçe u vra me armë zjarri më 24 mars në fshatin Stanoc të komunës së Vushtrrisë. Autori i dyshuar i krimit, 58 vjeç, vrau më pas veten.
“Ajo ka punuar në furrë buke për të na mbajtur neve”, thotë ai për Radion Evropa e Lirë.
“Vrasja e nënës sime duhet të jetë rasti i fundit”, thotë ai.
Nexhmije Haradini, mbeti e vrarë dje në Stanoc të Vushtrrisë.
Njëri nga të afërmit e të ndjerës, Rrahim Ajeti tregoi për emisionin “Kosova Today” në Klan Kosova, se viktima ishte e shoqëruar së bashku me një shoqe dhe vajzën e saj të mitur, e cila ishte dëshmitare e gjithë skenës së vrasjes.
E ndjera ka lënë pas tre fëmijë, djalin 19 vjeç dhe dy vajza të moshës 12 dhe 16 vjeçare.
