Rruga për në shtëpi pas festës me familjarët, u kthye në tragjedi. Tre shqiptarë kanë ndërruar jetë mëngjesin e kësaj të diele në Koblenz të Gjermanisë, pasi minibusi me të cilin po udhëtonin doli nga rruga dhe u rrokullis disa herë.
Mësohet se gjashtë pasagjerët e tjerë kanë mbetur të plagosur. Paraprakisht, dyshohet se viktimat janë një burrë rreth 53 vjeç dhe dy gra të moshës 47 dhe 65 vjeç. Teksa pritet zbardhja e plotë e aksidentit, dyshohet se shoferi 22 vjeçar i automjetit ka qenë nën efektin e alkoolit.
Detajet raportohen nga mediat gjermane.
Policia tha se përveç shqiptarëve në automjet kishte edhe shtetas të huaj.
Personeli i emergjencës në vendin e aksidentit në Rheinland-Pfalz u trondit gjithashtu nga numri i viktimave.
“Është një aksident vërtet i tmerrshëm”, i tha një zëdhënës i policisë Agjencisë Gjermane të Shtypit.
Autostrada fillimisht u mbyll plotësisht midis Koblenzit dhe Ochtendungut herët këtë mëngjes pasi operacionet e shpëtimit zgjatën me orë të tëra.
