Muaji Shkurt shënoi sërish rritje të numrit të vizitorëve dhe net-qëndrimeve në hotele dhe struktura të tjera akomoduese, krahasuar kjo me të njëjtën periudhë të një viti më parë, por paradoksalisht ka rënë shfrytëzimi i dhomave të hoteleve.
Sipas të dhënave zyrtare të INSTAT, Instituti i Statistikave, gjatë muajit të dytë këtij në këto struktura pati 29,9 % më shumë vizitorë. Prej tyre ata jo-rezidentë shënuan një rritje prej 32,2 % dhe rezidentë 26,4 %.
Ndërkohë net-qëndrimet u rritën me 34,2 %. Ato nga jo-rezidentët u rritën me 35,4 %, ndërsa ato nga rezidentët me 32,0 %. Por norma e shfrytëzimit të dhomave në hotele ra në 16,5 %, krahasuar me 16,7 % që ishte në Shkurt 2024, çka do të thotë se shumica e turistëve të huaj vijnë në Tiranë dhe marrin banesa me qira.
INSTAT raporton se rritja më e madhe e vizitorëve jo-rezidentë u shënua në zonat jo-bregdetare me 29,0 %.
Shumica e vizitorëve jo-rezidentë të cilët u akomoduan në strukturat pritëse në Shqipëri vijnë nga Italia dhe pas tyre vijnë ata nga Kosova, Gjermania, Mbretëria e Bashkuar dhe Franca. Këto të dhëna reflektojnë prirjen e rritjes së turizmit hyrës nga tregjet kryesore të rajonit dhe Evropës.
