Gjykata e Posaçme ka lënë në fuqi masën e sigurisë “Arrest me burg” për ish- efektivin e RENEA-s, Altin Morina.
Altin Morina, ish-efektiv i RENEA-s, është arrestuar gjatë orëve të vona të mbrëmjes së djeshme, pasi ishte shpallur në kërkim që prej majit 2024 në kuadër të operacionit policor “Revanshi”. Gjatë ndalimit, dyshohet se Morina mbante me vete edhe një armë zjarri, pistoletë.
Ai akuzohet se ka bashkëpunuar me Durim Bamin për organizimin e kultivimit të bimëve narkotike në zonat e Niklës dhe Tapizës. Morina ka pasur edhe më parë probleme me ligjin. Në mars të vitit 2023, ai u arrestua pasi në makinën me të cilën udhëtonte në zonën e Kodrës së Diellit iu gjetën 113 mijë euro.
Megjithatë, në prill të po atij viti, Gjykata e Tiranës e liroi nga masa e arrestit dhe e la me detyrim paraqitje, pasi Morina paraqiti në gjykatë një faturë që tregonte se shumën e kishte marrë hua nga një biznesmen për çështje personale. Në atë kohë, policia dyshonte për lidhje të tij me grupin e shumëkërkuarit Ervis Martinaj.
