Drejtori sportiv i Lecces, Panteleo Corvino, ka dhënë një pasqyrë të qartë mbi situatën e merkatos së klubit, duke folur për largimin e mundshëm të disa prej lojtarëve kryesorë, mes tyre edhe mesfushorit Ramadani. Në një deklaratë të fundit, Corvino theksoi se sezoni aktual përfaqëson përfundimin e një cikli për disa futbollistë që kanë dhënë kontribut të rëndësishëm për ekipin.
“Kur flas për merkaton dua të jem i qartë se do të dalim në përfundime duke bërë llogaritë edhe për ciklet e kryera. Mendoj se ky vit ka qenë ai i fundit i një cikli për shumë lojtarë,” tha drejtori sportiv, duke përmendur emrat e Falcone, Baschirotto, Ramadani, Krstovic dhe Gallo si elementë të rëndësishëm që mund të largohen.
Corvino gjithashtu theksoi se klubi nuk do të bëjë rezistencë në rast se futbollistët shprehin dëshirën për të ndryshuar ambient: “Nëse ata na kërkojnë që të largohen, ne nuk do të bëjmë qëndresë. Kemi vendosur që të pranojmë vullnetin e tyre.”
