Presidenti i FIFA-s, Gianni Infantino, ka qenë i zëshëm në mbrojtjen e Kupës së Botës 2034 në Arabinë Saudite dhe marrëdhënies së tij me presidentin e SHBA-ve, Donald Trump.

Mbretërisë së Gjirit iu dha në mënyrë kontroverse e drejta për të pritur Kupën e Botës në një kongres të FIFA-s në dhjetor, pavarësisht shqetësimeve për të drejtat e njeriut, rreziqet për punëtorët migrantë dhe kriminalizimin e marrëdhënieve të të njëjtit seks.

Vendimi i FIFA-s u kritikua edhe nga federata norvegjeze e futbollit, por, duke folur në Belfast, Infantino tha: “Ka pasur një vendim të Kongresit, i cili bashkoi të gjithë botën. Mendoj se ishte një hap shumë pozitiv për futbollin, për të sjellë në tetë vjet futboll në të gjithë botën, duke i mirëpritur të gjithë”.

“Ne duhet t’i sjellim të gjithë në tryezë. Ne do të shkojmë në Amerikën e Veriut në 2026, do të shkojmë në Amerikën e Jugut, do të shkojmë në Afrikë, do të shkojmë në Evropë në 2030. Do të kthehemi në Azi për vitin 2034”.

“Kongresi i FIFA-s e miratoi këtë, u bë pas një raporti të plotë për të gjitha këto”, shtoi ai.

Infantino gjithashtu u përball me pyetje në lidhje me marrëdhëniet e tij me presidentin amerikan Trump dhe familjen e tij.

Vajza e Trump, Ivanka mori pjesë në shortin e FIFA-s për Kupën e Botës për Klube, ndërsa Infantino mori pjesë në inaugurimin e Trump në janar.

I pyetur pse ishte kaq i afërt me presidentin e SHBA-ve, Infantino tha: “Unë mendoj se është absolutisht thelbësore për suksesin e një Botërori të kesh një marrëdhënie të ngushtë me presidentin”.

“Ne po presim një Kupë Botërore për Klube këtë vit, të parën Kupën e Botës për Klube të FIFA-s, me 32 ekipe, në Shtetet e Bashkuara të Amerikës”.

“Po organizojmë një Kupë Bote vitin e ardhshëm në Shtetet e Bashkuara, Meksikë dhe Kanada. Dhe të mos harrojmë se kur u zhvillua gara për atë Botëror, Presidenti Trump ishte tashmë President i Shteteve të Bashkuara”, shtoi ai.

Infantino u pyet gjithashtu për mundësinë e kthimit të Rusisë në futbollin botëror nëse mund të arrihet një marrëveshje paqeje pas pushtimit të Ukrainës.

“Ne presim që çdo vend në botë të jetë në gjendje të luajë futboll”, tha Infantino pas mbërritjes në mbledhjen e përgjithshme vjetore të Bordit të Shoqatës Ndërkombëtare të Futbollit (IFAB), i cili përcakton ligjet e sportit.

“Ne të gjithë shpresojmë që bisedimet e paqes të jenë të suksesshme, sepse mendoj se është e rëndësishme që t’i mbështesim ato për botën, shumë më tepër sesa për futbollin, që të kemi paqe”.

“Nëse ka një rol të vogël që futbolli mund të luajë, pasi të ketë paqe, atëherë sigurisht që ne do të luajmë rolin tonë”, përfundoi ai.