Listat e (pa) hapura

Listat e hapura dhe draftet e propozuara nga dy palët politike janë kthyer në ngërç për procesin e reformës zgjedhore. Opozita e bashkuar kërkon rekomandimet e ODIHR, ndërkohë që për draftin e propozuar nga PS thonë se nuk i hapin 100 përqind listat

Listat e hapura dhe draftet e propozuara nga dy palët politike janë kthyer në ngërç për procesin e reformës zgjedhore. Në tryezën e Këshillit Politik, opozita e bashkuar kërkon rekomandimet e ODIHR ndërkohë që për draftin e propozuar nga PS thonë se nuk i hapin 100 përqind listat.

Edhe pse akoma nuk është thënë fjala e fundit për listat e kandidatëve për deputetë me të cilat do të votojnë shqiptarët në 25 prill, projektligji që PS ka paraqitur në Këshillin Politik ka hapur mjaft debate si në mjedisin politik dhe në atë të analistëve dhe shoqërisë civile.

Sipas projektligjit të PS, është partia ajo që dorëzon në KQZ listën e kandidatëve për deputetë për 12 qarqet elektorale sipas renditjes shifrore të bërë nga partua. Pra që në fillim nuk kemi të bëjmë me një renditje sipas rendit alfabetik por renditje të përcaktuar nga partia e cila mund të përmbyset vetëm nëse një kandidat jashtë pjesës fituese të listës së kandidatëve merr më shumë vota sesa mesatarja e votave fituese për një mandate në atë qark. E thënë më thjesht nëse një në një qark ka 12 mandate në dispozicion të gjitha partive, kryetarët e partive do të përcaktojnë renditjen e tyre nga 1 në 12.

Nëse në atë qark fjala vjen PS fiton 7 mandate me një mesatare prej 9000 votash për mandate, atëherë nëse kandidati I tetë mund të bëhet fitues vetëm nëse ka fituar mbi 9000 vota dhe gjithmonë më shumë se shtatë kandidatët e tjerë. Nëse kandidati I renditur I teti në listë merr 9000 vota dhe I shtati ka fjala bie 300 vota, është ky I fundit që bëhet deputete sepse kandidati me 9000 vota duhet të merrte më shumë se ky prag.

Propozimi i PS është që partia të dalë me një listë të saj të përcaktuar dhe vetëm nëse ndodh ndonjë çudi renditja e saj të ndryshojë.

Një votues prezumohet të përzgjedhë vetëm një emër kandidati për deputet, jo psh. sa ka Kosova, 5. Pra nëse në një qark të gjithë socialistët shënjojnë emrin e kreut të listës , aty lista nuk ndryshon.

Propozimi i Gjiknurit është krejt i ndryshëm nga ai i PD-së e cila propozon një listë kandidatësh të renditur alfabetikisht, ku kush është më i votuar nga qytetarët bëhet deputet.

Diskutimet

Kryetari i Grupit Parlamentar të Partisë Socialiste, Taulant Balla tha dje se propozimi për renditjen e kandidatëve për deputetë është ndjekur si shembull rasti i disa vendeve të tjera Evropiane.

Balla duke folur në përfundim të mbledhjes së grupit theksoi se, një kandidat për deputet që të marrë mandatin përtej renditjes së bërë nga partia duhet të ketë marrë aq vota sa mjaftojnë për të marrë një mandat.

Për Qarkun e Tiranës, që një kandidat i PS-së të zgjidhet deputet duhet të sigurojë në emrin e tij të paktën 12 mijë vota që të jetë në Parlamentin e ardhshëm pas zgjedhjeve të 25 prillit.

“Edhe ligjvënësit e Austrisë, Çekisë, Kroacisë kanë analizuar prej shumë vitesh dhe kanë konkluduar në një formë që nuk është aspak e vërtetë se një kandarit duhet të marrim më shumë vota se sa partia. Këtë formulë nuk e kemi shpikur ne, por kanë  një pjesë e madhe e vendeve”, u shpreh Balla.

Kreu i grupit të PS tha se, mazhoranca qeverisëse është e hapur për të pritur propozime nga Partia Demokratike mbi këtë çështje.

“Nuk e besoj se PD do të vetë përjashtohet nga ky proces, kam besim se opozita jashtëparlamentare do të kontribuojë me propozime korrekte për të përmirësuar draftin”, tha ai.

Ndërsa për refuzimin e kërkesës së PD që të merret mendim nga OSBE/ODIHR për çështjen e koalicioneve parazgjedhore, Balla tha se kjo është çështje e brendshme e Shqipërisë.

“Ndryshimet kushtetuese kanë bërë fakt këtë çështje dhe se në historinë e ODIHR, ODIHR dhe Komisioni i Venecias e kanë thënë qartë se këto janë çështje që i përkasin sovranitetit të plotë të vendeve anëtare të OSBE-së”, deklaroi kreut i grupit të PS.

Meta

Presidenti Ilir Meta, përmes një statusi të publikuar në faqen e vet zyrtare në Facebook këtë të diel iu rikthye toneve kërcënuese ndaj mazhorancës, që sipas tij po përdor manovra nga më të ndryshmet për të prishur në mënyrë të njëanshme Marrëveshjen e 5 Qershorit.

Kreu i shtetit përsëriti thirrjen për hapjen 100 për qind të listave, nga të cilat sipas tij nuk duhet të ketë frikë askush.

“Çdo manovër mashtruese që u heq të drejtën qytetarëve të zgjedhin vetë edhe deputetët, siç ju premtua, vetëm me qëllimin për të prishur në mënyrë të njëanshme Marrëveshjen e 5 Qershorit, do të ndëshkohet fort nga të gjithë qytetarët që prej 12 vitesh kërkojnë deputetë e jo kukulla kryetarësh.

Mos kini frikë nga hapja e listave!

Hapni listat ose largohuni!”, shkroi kreu i shtetit.

Në një konferencë për mediat dy ditë më parë presidenti Meta reagoi ashpër ndaj nismës së mazhorancës për ligjin organik që kornizën kompetencat e presidentit teksa kërcënoi se mund të shpërndante parlamentin edhe përpara zgjedhjeve të 25 prillit. Sipas tij, mazhoranca është e paaftë për ta shkarkuar gjë që e ka dëshmuar me komisioni e dështuar të ngritur për këtë qëllim.

“Nuk ka ligj antikushtetues nga një parlament jo kushtetues që e pengon presidentin të përmbushë misioni e tij në mbrojtje të zgjedhjeve të lira e të ndershme. Mazhoranca e ka provuar me presidentin; 3-0, sa herë ka vajtur në Venecia.

Mos e ktheni betejën me presidentin, se ky është presidenti i 2 marsit, jo i LSI. Populli është aty dhe kërkon shpërndarjen e parlamentit. Duan të shpërndahen para 25 marsit? Le të më shkarkojnë, kush i pengoi këta të më shkarkonin mua?” tha presidenti.

PS: Presim propozimin e opozitës jashtëparlamentare

Deputetja Rudina Hajdari i ka dërguar një letër Këshillit Politik, ku i kërkon që nesër, pra ditën e martë, 22 shtator, ora 10:00 të mblidhet për të punuar ‘non stop’ deri në realizimin e një dokumenti të dakortësuar për mundësimin e hapjes 100% të listave, për tua dhënë zgjedhësve në dorë fuqinë për të përzgjedhur përfaqësuesit e ardhshëm në Kuvend.

Ndërkohë në një përgjigje të fundit socialisti Damian Gjiknuri për ftesën e Hajdarit, duke mos thënë diçka konkrete për ditën e nesërme, thotë se në mbledhjen e fundit të Këshillit Politik, Partia Socialiste depozitoi amendamentet e saja për ndryshimet në Kodin Zgjedhor si reflektim i ndryshimeve Kushtetuese të hyra tashmë në fuqi.

Gjiknuri thekson më tej se: Në rast se opozita jashtëparlamentare, brenda afateve që na ka caktuar Kuvendi, do të vazhdojë të refuzojë ftesën për të dhënë kontributin e saj me amendamente konkrete të Kodit Zgjedhor, Ju si opozitë parlamentare keni gjithsesi të drejtat dhe hapësirat e plota ligjore për ti bërë amendamentet tuaja pjesë të diskutimit që do duhet të zhvillohet pa diskutim në Komisionin Parlamentar për Çështjet Ligjore dhe grupin përkatës të punës ku përfaqësohet si mazhoranca ashtu edhe minoranca në Kuvend.

Përgjigjia e Gjiknurit

Në mbledhjen e fundit të Këshillit Politik, Partia Socialiste depozitoi amendamentet e saja për ndryshimet në Kodin Zgjedhor si reflektim i ndryshimeve Kushtetuese të hyra tashmë në fuqi. Amendamente që në gjykimin tonë garantojnë plotësisht parimet kushtetuese për hapjen 100% të listave ashtu sikurse sigurojnë të drejtën e çdo qytetari për të vlerësuar nominalisht me votë preferenciale secilin kandidat e më tej duke ri renditur listën përpara ndarjes përfundimtare të mandateve. Gjithsesi, duke konfirmuar se jemi plotësisht të gatshëm të diskutojmë rreth propozimeve tona me synim arritjen e një produkti me konsensus sa më të gjerë, në cilësinë e përfaqësuesit të mazhorancës kërkova nga përfaqësuesit e tjerë të Këshillit Politik që të sjellin opinionin në raport me draftin tonë ose propozime alternative.

Gjej rastin të ju falënderoj që Ju zonja Hajdari ju përgjigjet pozitivisht thirrjes për të kontribuar në mënyrë aktive, me propozime konkrete. Duke qenë se Këshilli Politik u krijua si strukturë ekstra-parlamentare, me synim primar përfshirjen e kontributit të opozitës jashtëparlamentare në procesin e reformës zgjedhore, do kërkoja mirëkuptimin tuaj për ti dhënë kohën e nevojshme edhe përfaqësuesve të opozitës jashtëparlamentare që të paraqesin dhe ata propozimet e tyre konkrete për amendamentet e Kodit Zgjedhor. Duke patur kontributin konkret me drafte nga të gjitha palët në Këshill, mund të kryejmë më pas procesin e negocimit në këtë strukturë ekstra-parlamentare, për një produkt me konsensus sa më të gjërë të mundshëm.

Në rast se opozita jashtëparlamentare, brenda afateve që na ka caktuar Kuvendi, do të vazhdojë të refuzojë ftesën për të dhënë kontributin e saj me amendamente konkrete të Kodit Zgjedhor, Ju si opozitë parlamentare keni gjithsesi të drejtat dhe hapësirat e plota ligjore për ti bërë amendamentet tuaja pjesë të diskutimit që do duhet të zhvillohet pa diskutim në Komisionin Parlamentar për Çështjet Ligjore dhe grupin përkatës të punës ku përfaqësohet si mazhoranca ashtu edhe minoranca në Kuvend.

Duke ju ftuar të depozitoni një kopjo të propozimeve tuaja zyrtarisht edhe pranë Komisionit Parlamentar për Çështjet Ligjore, mbetemi në pritje që opozita jashtëparlamentare të depozitojë në Këshillin Politik ose në Kuvendin e Shqipërisë propozimet konkrete për amendamentet e Kodit Zgjedhor në zbatim të ndryshimeve Kushtetuese të 30 Korrikut. /Gazeta Liberale

Tags: gjiknuri, keshilli politik