Katarsisi Basha

Pas shkarkimit të Flamur Nokës nga Komisioni i Sigurisë, Lulzim Basha pranoi se në qeverisjen e mëparshme të PD dhe brenda partisë ka elementë të korruptuar. Ai theksoi dje qasjen euro-atlantike të PD dhe tha se PD nuk do të bunkerizohet për interesa personale. Deklaratat e Bashës e jehuan si paralajmërimi i ndonjë lëvizjeje katarktike për të pastruar PD nga brenda, ndërsa emrat e deputetëve në krah të Berishës po shtohen

Me flamurin e pro-amerikanizmit, Lulzim Basha duket se ka nisur një fushatë katharsisi brenda Partisë Demokratike.

I vetëdijshëm se pas përjashtimit të Sali Berishës nga grupi parlamentar i PD, do të kishte mbi të zëra kritikë dhe kundërshtues, megjithatë kryedemokrati e mori vendimin – të cilësuar prej vetë atij – si më të vështirin e jetës. Zoti Berisha mbeti jashtë Grupit Parlamentar të PD-së, në një vendim të marrë jo në mënyrë kolegjiale nga partia por vetëm nga kryetari, ndërsa Basha sqaroi njëherë e mirë pozicionin e Selisë Blu si aleate e madhe e Shteteve të Bashkuara të Amerikës.

Ndonëse ish-kryeministri e cilësoi nul vendimin e kryetarit aktual të PD-së për përjashtimin e tij dhe u deklarua si deputet i grupit parlamentar, “Foltorja” mblodhi gjatë rrugës figura konkrete brenda partisë, që u rreshtuan krah Berishës, duke kundërshtuar zotin Basha në vendimmarrjen e tij.  Ky i fundit deklaroi pak kohë më parë se nuk do të lejonte mbajtjen e asnjë Kuvendi anti-amerikan, ndërsa nga ana tjetër mbledhja e firmave mes demokratëve paralajmërojnë jo vetëm mbledhje Kuvendi por edhe ndryshime të rëndësishme brenda partisë.

Pasi siguroi pozicionin prej lideri, me vendimin e marrë i vetëm pas thirrjeve të ambasadës amerikane për të rishikuar listat e deputetëve e për të mos lejuar njerëz të akuzuar për korrupsion brenda Parlamentit, Basha duket se ka nisur gjithaq kundërsulmin ndaj atyre që po i dalin kundër nga brenda partisë.

Dy ditë më parë, ai shkarkoi Flamur Nokën nga pozicioni i tij si nënkryetar i Komisionit të Sigurisë dhe e paralajmëroi për përjashtim nga Grupi i Partisë Demokratike.

Noka do ta cilësonte, ashtu si Berisha më herët vendimin ndaj tij, si nuk dhe të paligjshëm. Ai madje zbuloi se ishte njoftuar nga kryetari, pasi ky i fundit e kishte komunikuar në media.

Ky vendim erdhi pasi Noka u shpreh ashpër ndaj kryetarit të PD-së, duke thënë se fati i karriges së Bashës është më i shtrenjtë se fati i partisë dhe i demokratëve.

Noka madje pretendoi se gjatë mbledhjes së komisionit të Sigurisë në PD, Basha kishte cilësuar si “llum” qeverisjen e Partisë Demokratike. Selia Blu hodhi poshtë pretendimet e Nokës, duke i cilësuar ato “përpjekje të dëshpëruara” dhe mohoi që kryetari Basha të ketë etiketuar anëtarësinë e partisë me fjalën “llum”.

“Kjo fjalë është përdorur për ata të cilët në qeverisjen e PD kanë mbushur xhepat me paratë e korrupsionit dhe sot, në partneritet me Edi Ramën dhe njerëzit e tij, duan të përdorin anëtarësinë e PD për interesat e tyre personalë dhe të pushtetit të Ramës”, sqaroi Partia Demokratike.

Pas takimit me ministren britanike për Europën, Wendy Morton, kreu Basha dhe se PD nuk mund të mbetet peng i interesave personale që  kërkojnë ta kthejnë PD në bunker.

Basha theksoi edhe njëherë se  kundërshtar dhe armik i demokratëve mbetet kryeministri Rama dhe ajo që ai e cilëson si “regjimi i tij”. Basha i cilësoi sajesa, shpifje dhe keqinformime ato të zotit Noka, ndërsa ky i fundit në një tjetër reagim në rrjetet sociale tha se kryedemokrati po e “lufton Ramën, duke përjashtuar dhe përçarë demokratët”.Basha saktësoi se Noka ishte paralajmëruar, por jo përjashtuar nga grupi i PD.

“Kush është llumi i qeverisjes jua them unë tani. Pra, fraza të dala indirekt apo dhe këtu nga kjo foltore, nga këto shkallë të Partisë Demokratike që janë sajesa dhe shpifje, i shërbejnë Edi Ramës”, tha Basha duke shtuar se kjo demoralizon shqiptarët.

Edhe njëherë Basha foli për oligarkë e pushtetarë të korruptuar, duke i cilësuar si llumi i tranzicionit. “A ka pasur llum në kohën e qeverisjes së Partisë Demokratike? Padiskutim që po. Një pjesë e kemi pastruar kur kemi qenë në qeverisje, një pjesë nuk ia kemi dalë dot ta pastrojmë. Njerëz që sot kanë kontrata me koncesionet e inceneratorëve”, tha Basha duke hedhur akuza, ndërsa gjatë dy mandateve qeverisëse të zotit Berisha si kryeministër, ai ka mbajtur disa poste ministrore, nga ai i Transportit, i Punëve të Jashtme dhe në fund si ministër i Brendshëm.

Basha, i cilësoi këta si bishtat e korruptuar të ish-qeverisjes së PD-së, duke pohuar se një pjesë kanë mbetur ende  në Partinë Demokratike.

Kryedemokrati vijoi me akuzat, duke thënë : “Njerëz që sot hapin gropa në Tiranë për të pastruar paratë. Njerëz që kanë frikë nga gjëmat e tyre dhe që janë të shantazhueshëm nga Edi Rama, janë shantazhuar nga Edi Rama për t’i shërbyer Edi Ramës apo promovuar nga Edi Rama. Që këto para të vëna me praktika korruptive, gjatë kohës që qeverisnim ne t’i përdorin për të shantazhuar demokratët në një rrugë pa krye dhe ndërkohë të akuzojnë kryetarin e Partisë Demokratike se po u bëka presion demokratëve, kjo është e patolerueshme”, tha Basha.

Përcaktimi  “non grata” i ish-kryeministrit nga Sekretari i Shtetit Blinken pati si motivacion pikërisht informacionet e DASh mbi përfshirjen në korrupsion domethënës të zotit Berisha si edhe minimin e demokracisë, gjatë kohës kur ky i fundit ishte kreu i qeverisë shqiptare.

Zoti Basha, ndërsa e lëvdoi figurën e Berishës dhe përshkroi kontributet e tij në aleancën me Shtetet e Bashkuara të Amerikës, do t’u thoshte të tijve se i ishin paraqitur informacione edhe më të hollësishme dhe se vendimi për të qenë jashtë grupit parlamentar ishte më e mira për të gjithë familjen Berisha.

“Ndaj, një gjë ta keni të qartë: Partia Demokratike është shpresa e vetme e këtij vendi. Është shpresa e vetme e shqiptarëve për ndryshim. Ky është një moment fondamental ndryshimi. Kushdo që mendon se do ta kthej Partinë Demokratike në bunker për interesat e veta personale, që do të ndryshojë orientimin tonë Euro-atlantik, apo që do të thyej vendosmërinë time për t’u përballur me korrupsionin dhe krimin e organizuar që përfaqëson Edi Rama dhe regjimi i tij dhe bishtat e korruptuar të ish-qeverisjes tonë, siç e thash një pjesë e kemi pastruar atëherë, por një pjesë kanë mbetur dhe demokratët e dinë fare mirë kush janë e ku janë e se çfarë pazaresh kanë bërë dhe bëjnë edhe sot me Edi Ramën”.  Basha theksoi orientimin  pro-perëndimor dhe amerikan të PD-së, ndërsa ish-kryetari Berisha e akuzoi se ishte i marrë peng dhe se kishte shkelur sovranitetin e partisë edhe pse nuk mohoi se ndaj Bashës mund të kishte pasur presion të madh,

“Nuk do të lejoj asgjë dhe askënd t’i bjerë me shkelmë sakrificës së demokratëve. Gjithçka që e kam bërë dhe po e bëjmë është në interesin më të mirë të demokratëve për të nderuar sakrificën e tyre, sepse po ju them dhe një herë, nuk ka shpresë tjetër për ndryshim për Shqipërinë dhe shqiptarët përveç Partisë Demokratike dhe demokratëve shqiptarë”, tha më tej Basha, duke folur në  vetë të parë për qëndrimet e tij.  Pas rikonfirmimit si kryetari i PD-së, Basha e pa këtë si vullneti i shprehur i demokratëve për të ndjekur rrugën e tij në të ashtuquajturën betejë për demokraci.  Noka do të deklaronte nga ana tjetër se “Foltorja” e zotit Berisha- turi i nisur prej tij nëpër Shqipëri – ishte zgjidhja e vetme për PD.

Vendimi për të shkarkuar Nokën nga funksioni i tij në Komisionin e Sigurisë, i ndezi edhe njëherë zërat kundërshtarë brenda Partisë Demokratike.

Ndërsa qëllimi i demokratëve, pasi vendosën të marrin pjesë në zgjedhje e të hyjnë në Parlament, ishte të luftojnë për transparencën e masakrës zgjedhore dhe siç thotë vetë kreu, largimin e kryeministrit Rama, tanimë brenda PD janë kristalizuar dy pole dhe ka nisur një betejë e brendshme.

Ndërsa Basha fliste për bishta  ende të korruptuar brenda partisë, deklaratat e tij jehuan si paralajmërimi i ndonjë lëvizjeje katarktike për të pastruar PD nga brenda, ndonëse Basha pranoi për ish-zyrtarë të korruptuar të qeverisjes Berisha, ku ka qenë edhe vetë ministër. Me këto pohime, gjithsesi ai distancoi veten duke folur për vendosmërinë t’i shkojë në krye betejës për largimin e regjimit të kryeministrit Rama.

Gjatë verës, përballë kundërshtarëve brenda PD që kërkonin largimin e tij dhe reformimin e partisë për zgjedhjet e 2025-s, Basha u përgjigjej se demokratët dhe shqiptarët nuk do të prisnin deri atë kohë për largimin e Ramës.

Megjithëse ai paralajmëroi muaj të vrullshëm atëkohë, hyrja në hullitë institucionalë dhe të parlamentarizmit e bën Bashën dhe demokratët të presin afatet kushtetuese për zgjedhjet e ardhshme. Lëvizja e PD dhe Opozitës së Bashkuar për të djegur mandatet e për të kërkuar përmes protestave apo planeve me pesë pika largimin e kryeministrit Rama më 2019-n, rezultuan pa të pafrytshme, duke e çuar më pas  opozitën të arrijë marrëveshjen për Reformën Zgjedhore e të marrë pjesë  në zgjedhjet e 25 Prillit.

Ish-kryeministri Berisha, nga “Foltorja” e pozicionuar dje në Kukës komentoi shkarkimin e Nokës, duke thënë se Basha e bëri këtë si pasojë e frikës. Ai madje e quajti Bashën, ish-kryetar të PD-së, megjithëse ky i fundit u konfirmua në zgjedhjet e brendshme të 13 qershorit.

“E ka kap një frikë e tmerrshme nga ju. Nuk ju takon, merr vendime nga zyra. Të gjitha nga frika. Së fundmi tha e përjashtova edhe Flamur Nokën nga kjo detyrë. Por dy gjëra do u them: që në mënyrë absolute, as unë dhe askurrkush nga ju nuk i ka faj për frikën që i ka hyrë. E ka vetë. Ato i ka vetë”, tha Berisha duek e cilësuar Bashën si peng dhe tha se duhet të ikë sa më shpejt nga drejtimi i partisë.

Deklaratat e kreut dhe ish-kreut dukeshin përgjigje e kundërpërgjigje ndaj njëri-tjetrit, megjithëse Berisha zgjodhi disi ta shpërfillë Bashën dje duke iu drejtuar me një mesazh kryeministrit Rama.

“Edvin ndiqe këtë foltore! Kjo është punë burrash dhe jo punë pengjesh, punë burrash dhe grash të mira dhe jo punë pengjesh”, tha Berisha, ndërsa shtoi se qëllimi i “Foltores”  është rithimelimi i PD dhe kthimi te vota e lirë.

Ndërkohë në “Foltore”-t e zotit Berisha janë shfaqur anëtarë të Partisë  Demokratike. I pari që doli hapur në krah të tij, në seancën e parë të Parlamentit ishte Tritan Shehu, i cili e ka shoqëruar edhe në disa ndalesa të këtij turi.  I pranishëm ka qenë edhe ish-presidenti Nishani, një nga pjesëtarët e Grupimit për PD-në, i ngritur pas zgjedhjeve e që kërkoi largimin e kreut Basha duke ia faturuar këtij të fundit të gjitha dështimet në zgjedhjet parlamentare e lokale. Në një intervistë televizive, Bujar Nishani foli për mundësinë e një referendumi mes demokratëve dhe paralajmëroi se dhjetori do ta gjejë PD me ndryshime të mëdha.

Po ashtu edhe Oerd Bylykbashi është shfaqur në krah të Berishës, ndërsa në mbledhjet brenda PD ka pasur edhe debate me kryetarin Basha rreth votimit për zgjatjen e mandateve për organet e vetingut.

Ndërsa PD ishte unanimisht dakord për miratimin e Reformës në Drejtësi më 2016 , për  demokratë si Bylykbashi përparësi e tyre si opozitë është Reforma Zgjedhore e ajo territoriale. Ndaj kreut Basha ka pasur hamendje e akuza për një “Pazar” të mundshëm me maxhorancën.

Kreu i Grupit Parlamentar të PS, Balla e mohoi një pretendim të tillë, duke thënë se nuk ka asnjë pazar me opozitën për zgjatjen e mandatit të organeve të vetingut në këmbim të votave për reformën territoriale.

Edhe Basha u ka thënë demokratëve të refuzojnë çdo ide se “na qenkësh  ofruar pazar i ndarjes territoriale për vetingun”.

Në krah të Berishës janë rreshtuar edhe figura të tjera si ish-nënkryetari i PD-së Edmond Spaho, i cili reagoi dje për shkarkimin e Nokës.

“Lul mjaft me dëbime, fillo internimet tani. Bjeru deputetëve si më ‘45. Po ndonjë pushkatim nuk do bëjmë? Nuk e bën dot Enverin ti. I pari ishte historik, i dyti qesharak dhe i mjerë. Po të mblidhet litari, Lul, po të mblidhet”, shkruan Spaho. Edhe deputeti i qarkut Elbasan, Luçiano Boçi i është bashkuar nismës së Berishës, duke e çuar  në nëntë numrin e deputetëve demokratë të pozicionuar kundër Bashës.

Përtej anëtarëve që kanë përkrahur hapur Berishën, zotit Basha i duhet të përballet edhe me zëra të tjerë kundërshtarë siç është ai i nismës “Iniciativa Demokratike”, ku Fatbardh Kadillit, rivali i Bashës në zgjedhje, i janë bashkuar emra si Ivi Kaso, Arben Ristani apo Enno Bozdo.

Megjithatë, zoti Basha duket i bindur në qëndrimin e tij, ndërsa gjithnjë e më shumë përballë valës së anëtarëve të zemëruar e që e mendojnë ndryshe nga ai, thekson orientimin euro-atlantik të PD-së. Orientim që po i kushton rrezikun e një çarjeje brenda partisë, por edhe grupit parlamentar ku shumë nga deputetët  janë rreshtuar krah Berishës.

Tritan Shehu: Vazhdon cikli i ndëshkimeve të natës nga Basha

Deputeti i Partisë Demokratike për qarkun e Gjirokastrës, Tritan Shehu ka reaguar në lidhje me shkarkimin e Flamur Nokës nga detyra e nënkryetarit të të Komisionit të Sigurisë. Përmes një mesazhi në rrjetet sociale, Shehu thekson se ky është një ‘ndëshkim’ pa asnjë vendim kolegjial, pasi sipas tij nuk janë pyetur forumet dhe as grupi i PD-së.

Mes të tjerash demokrati bën thirrje që të shkohet sa më shpejt në Kongres.

REAGIMI I SHEHUT

Vazhdon cikli i ndëshkimeve të natës nga Z.Basha!

Po lexoj në media se Z.Noka qenka shkarkuar pak më  parë  nga detyra e tij si N.Kryetar i Komisionit të  sigurisë, dhe për më shumë  është paralajmëruar për përjashtim nga Grupi Parlamentar….sepse paska folur a thënë diçka!!

Sikur Noka të  ishte Zhukovi i BS, që  u shkarkua në  ajër nga frika se mos nxirrte tanket në  Moskë  në  mëngjes!

I dyti “ndëshkim” ky, pa asnjë vendim kolegjial, pa u pyetur asnjë forum, as Grupi vetë, i marrë nga Z.Basha në orët e vona!

Fill mbas atij për Z.Berisha.

Të  dyja arbitrare, pa respektuar rregullat, statutin, parimet e demokracisë!

Pra realisht të  pa vlefshme, nul!

Ngjarje këto krejtësisht të  gabuara për një Parti Demokratike!

Ngjarje këto, që  në  fakt janë krejt në   kundërshtim edhe me atë që  ne duhet të bëjmë e të  realizojmë.

Në  vend që  të  rrezojmë Ramën po “rrezojmë” veten tonë.

Një element më  shume ky, që tregon sa i domosdoshëm është Kuvendi i ynë Kombëtar, për të  diskutuar e debatuar se bashku, për të  dalë  nga kjo spirale kaq e rrezikshme ndëshkimesh e përjashtimesh, që  po u la kështu asnjë nuk mund të  parashikoje deri ku do shkojë  e si do të  përfundojë.

Një gjë mund ta parashikojmë, faktin se kjo metodike, këto “masa” nuk ndjellin asgjë të  mirë  për PD; demokratet, demokracinë shqiptare.Prandaj sa më  shpejt të  shkojmë ne Kongresin tone!

Berisha nga Kukësi: Edvin, ndiqe mirë këtë foltore, është çështje burrash dhe jo pengjesh!

Ish-kryeministri Sali Berisha ka nisur mbledhjen me demokratët e Kukësit, në atë që ai e quan “Foltorja”.

Gjatë fjalës së tij, Berisha tha se Edi Rama është kryeministri më anti-njerëzor që ka njohur historia shqiptare. Ish-presidenti tha se Rama ndodhet në pushtet falë abuzimeve me pushtetin dhe patronazhistët. Ai tha se qëllimi i “Foltores” është rithimelimi i PD dhe kthimi te vota e lirë

“Në emrin tuaj do ti them: Edvin ndiqe këtë foltore. Kjo është punë burrash dhe jo punë pengjesh, punë burrash dhe grash të mira dhe jo punë pengjesh.

Sot ne mblidhemi, në këtë foltore për të diskutuar së bashku, për të vendosur së bashku që t’i rikthejmë PD shpirtin e saj të lirisë votën. I rikthejmë asaj fitoren e Anteut, t’i rikthejmë demokratëve dhe demokrateve dinjitetin që ata sakrifikuan aq shumë për betejën për përmbysjen e komunizmit.

Ne mblidhemi në momente kritike për vendin, në një kohë kur një njeri i cili ka kaluar në këto 8 vite nga skandali në skandal, ka kaluar në këto 8 vite, me qeverisjen e tij duke e shndërruar Shqipërinë në delen e zezë në Rajon, duke shndërruar Shqipërinë në vendin më të pashpresë të planetit. Që nga koha e Enver Hoxhës deri më sot, shqiptarët s’kanë pasur një kryeministër anti-njerëzor si Edi Rama. Megjithatë ky zotëri nis mandatin e tretë pasi është shndërruar në një vasal të verbër të Beogradit. Një vit më parë, me shumicën e tij ai refuzoi të votojë në parlament rezolutën që dënonte gjenocidin serb në Kosovë, sepse e urdhëronte padroni i tij Aleksandër Vuçiç. Dua t’i çoj një mesazh Sllobananit të ri se do të njihet gjenocide serb ndaj shqiptarë nga vitet 70 deri në 1999. Nëse ne do të ngremë zërin fuqishëm, ne e bëjmë këtë si kusht it ë gjitha kushteve që Ballkani të ketë paqe. Edi Rama në këto 8 vite, në vend që të ndjekë nismën e Berlninit të cilën e udhëheq Gjermania, ndiqni nismën e Beogradit, të cilën e udhëheq padroni i tij Vuçiç. Mandatin se gëzon dot ti, sepse vetëm në zonat e tërmetit ke përdorur 160 mln euro para për të blerë votat e njerëzve të varfër. Nuk e gëzon dot mandatin Edvin, sepse ke përdorur patronazhistët. Ne si PD jemi në një situatë të vështirë, por jemi në një situatë ringjalljeje të fuqishme.

Vijmë në një kohë që ish-kryetari deklaroi masakrën elektorale, por u mor me karrigen e tij dhe harroi çdo gjë për votën. Kjo betejë është betejë për dinjitetin tonë, por sovranitetin e kësaj partie, kur një forcë politike nuk fiton besimin e atyre që i besojnë lirisë, vlerave të saj, nëse nuk sillen e veprojnë si forcë sovrane, nëse vullnetin ia diktojnë të tjerë dhe jo Ju. Ramës i përgjigjem nga Kukësi: ‘Njerëz të mirë, djem e burra e vajza të mirë, që e doni këtë vend, të bashkohemi për të përmbysur regjimin më të keq që ka pasur Shqipëria që nga Enver Hoxha e deri më sot. Qëllimi ynë është të bashkojmë vlerat, besimet, guximin, të bashkojmë më të mirët me më të mirët që jemi dhe kemi, për Shqipërinë që duam dhe të rivendosim demokracinë në Shqipëri. Kurrë ndonjëherë nuk ka pasur në Tiranë një kryeministër që të urreje me të gjithë qenien e tij siç është sot Edi Rama. Ai është një përçarës kombëtar që ka në histori analog vetëm Enver Hoxhën.

Foltorja është shndërruar falë shpirtit tuaj, virtyteve tuaja, në një gjenerator të fuqishëm shprese, besimi për shqiptarët. Çfarë synojmë ne me këtë? Ne synojmë të bashkohemi, të gjithë ata që besojnë te vota e lirë, besojnë se njerëzit e lirë duhet të vendosin vetë, besojnë se ju duhet të zgjidhni përfaqësuesit tuaj, besoj se nuk duhet të mashtrojnë nga pazarexhinjtë. Foltorja jonë nuk synon kurrë, izolimin, nuk synon cenimin e miqësive, ata që i bëjnë këto cilësime, ata janë njerëz të vegjël, shpirtzinj. Kjo parti, dhe ish-kryetari i saj, ka vendosur marrëdhëniet miqësore më të ngushta me SHBA, me vendet e BE. Kam nder dhe kënaqësi, të them që kam takuar dhe kam pritur, apo jam pritur nga 5 president të SHBA, përfshirë dhe Joe Biden kur ishte zv. President.

3 gjëra dua t’ju them. Kurrë ndonjë herë në histori nuk është shpallur “non grata” një njeri që ka 8 vite që është larguar nga roli udhëheqës. Kurrë nuk është shpallur “non grata” një njeri që s’është përballur apo akuzuar kurrë nga një gjykatë, si brenda dhe jashtë vendit. Kurrë nuk është shpallur “non grata” një njeri tre javë pasi forca e tij politike ka humbur zgjedhjet, megjithatë unë iu drejtova gjykatës, e mbajta çështje personale, kurse kërkesën për të mos u future në parlament se pranova kurrë. Ditën që u shpalla ‘non grata’ thash me vete çfarë kam bërë dhe i rikujtova të gjitha gjërat. Edhe thash që do të rikthehem për të mbrojtur interesat e shqiptarëve”, tha Berisha. /Gazeta Liberale