Një fluturim që nisej nga Berlini për në Milano u përjetua si një përvojë e tmerrshme për pasagjerët, kur avioni u godit papritur nga turbulenca të forta gjatë kalimit mbi Gjermaninë jugore. Ata përjetuan momente paniku dhe frike, teksa aeroplani lëkundej dhunshëm dhe disa u hodhën nga vendet e tyre.
Stuhitë e fuqishme shkaktuan lëvizje të papritura, duke bërë që piloti të ndërmarrë një ulje emergjente në aeroportin e Memmingenit. Në bord ndodheshin 179 pasagjerë dhe 6 anëtarë ekuipazhi. Fatkeqësisht, nëntë persona u plagosën, mes tyre edhe një fëmijë dyvjeçar dhe disa gra, të cilët morën trajtim mjekësor të menjëhershëm. Pasagjerët treguan se nuk ishin paralajmëruar në kohë për të vendosur rripat e sigurimit, duke shtuar tensionin në momentet kritike.
Kompania ajrore kërkoi falje për shqetësimin dhe konfirmoi se ka organizuar një fluturim zëvendësues për të dërguar pasagjerët drejt destinacionit të tyre.