Një vendim i pazakontë është marrë nga Gjykata e Lartë e Romës, e cila ka vendosur se edhe të dënuarit më të rrezikshëm, përfshirë bosët mafiozë, kanë të drejtë të gëzojnë aspekte të jetës private dhe emocionale gjatë vuajtjes së dënimit.

Rasti lidhet me Davide Emanuelo, ish-bos i mafies nga Sicilia, i cili ndodhet në regjim të izoluar që prej vitit 1993. Pas kërkesave të përsëritura, gjykata i njohu të drejtën për të takuar një grua britaniko-italiane 55-vjeçare, me të cilën ka ndërtuar një marrëdhënie të afërt përmes letrave dhe komunikimeve të gjata nga burgu.

“Folëm për dy orë dhe i thamë njëri-tjetrit sa shumë e duam,” ka treguar gruaja për agjencinë ANSA. Ajo është e angazhuar prej vitesh në mbrojtjen e të drejtave të të burgosurve dhe nuk ka asnjë lidhje me botën e krimit.

Gjykata e justifikoi vendimin me nevojën për të ruajtur një ekuilibër mes rendit publik dhe të drejtave njerëzore të të dënuarve, për sa kohë nuk cenohet siguria.

Emanuelo, 60 vjeç, ka qenë edhe më parë në qendër të vëmendjes, kur protestoi ndaj burgut për ndalimin e leximit të romanit “Emri i Trëndafilit” të Umberto Ecos, për shkak të kapakut të fortë që u konsiderua i rrezikshëm.

Në deklaratat e tij, ai vijon të mbrojë pafajësinë dhe filozofon mbi drejtësinë, duke cituar Aristotelin:

“Mes së vërtetës dhe gabimit, ekziston një hapësirë ku sundon ajo që duket e vërtetë, e pasigurt dhe e diskutueshme.”