Presidenti i Ukrainës, Volodymyr Zelensky, ka deklaruar se Rusia po kërkon tërheqjen e forcave ukrainase nga rajoni i Donbasit, në këmbim të një premtimi për moshapje të fronteve të reja lufte. Por qëndrimi i tij mbetet i palëkundur: “Ukraina nuk do të tërhiqet nga Donbasi.”

Në një deklaratë të fortë, Zelensky paralajmëroi se çdo tërheqje nga kjo zonë do t’i hapte rrugën Rusisë për të avancuar më tej drejt rajoneve të tjera jetike të vendit si Zaporizhia, Dnipropetrovski dhe Kharkivi. “Putin do të ketë akses të lirë drejt Zaporizhias, Dnipros dhe gjithashtu Kharkivit,” tha ai.

Presidenti ukrainas theksoi se nuk mund të ketë diskutime për territoret pa një armëpushim të plotë dhe garanci të forta sigurie për Ukrainën. Aktualisht, forcat ukrainase mbajnë nën kontroll rreth 30% të rajonit të Donetskut – afërsisht 9,000 kilometra katrorë – ku janë ngritur linja të fuqishme mbrojtëse dhe pozicione strategjike që u japin përparësi ushtarake.

“Tërheqja nga këto pozicione nuk do të ishte vetëm humbje territori, por edhe një kërcënim i drejtpërdrejtë për sigurinë kombëtare,” përfundoi Zelensky, duke theksuar se çdo marrëveshje paqeje duhet të respektojë integritetin territorial të Ukrainës.