Shtetet e Bashkuara dhe Kina kanë rënë dakord për një ulje drastike të tarifave për mallrat e njëra-tjetrës për një periudhë fillestare 90-ditore, sipas një deklarate të përbashkët të lëshuar nga të dyja vendet sot.

Njoftimi vjen pas një fundjave të negociatave të gjata tregtare në Gjenevë, Zvicër, nga zyrtarë të dy ekonomive më të mëdha të botës.

Duke filluar nga 14 maji, SHBA do të ulin përkohësisht tarifat për mallrat kineze nga 145% në 30%, ndërsa Kina do të ulë tarifat për importet amerikane nga 125% në 10%, sipas deklaratës të përbashkët.

Të dyja palët gjithashtu ranë dakord për krijimin e “një mekanizmi për të vazhduar diskutimet mbi marrëdhëniet ekonomike dhe tregtare,” të udhëhequra nga nënkryetari i Kinas, He Lifeng, dhe Sekretari i Thesarit të SHBA-së, Scott Bessent, dhe Dërguari i Tregtisë i SHBA-së, Jamieson Greer, sipas njoftimit.

“Diskutimet mund të zhvillohen alternuar në Kinë dhe SHBA, ose në një vend të tretë me marrëveshje të dy palëve. Sipas nevojës, të dyja palët mund të zhvillojnë konsultime në nivel pune mbi çështje të rëndësishme ekonomike dhe tregtare,” thuhej në deklaratë.

Uashingtoni kishte theksuar përparimin drejt një “marrëveshjeje” të dielën pas përfundimit të bisedimeve, ndërsa Pekini lavdëroi marrëveshjen e ndërsjellë për të filluar një proces të formalizuar negociatash ekonomike dhe tregtare.

Lufta tregtare ka pasur ndikime të mëdha në ekonomitë e SHBA-së dhe Kinës. Të premten, zyrtarët e porteve amerikane thanë se asnjë anije ngarkese nuk kishte dalë nga Kina me mallra për dy portet kryesore të Perëndimit të SHBA-së gjatë 12 orëve të fundit. Kjo nuk kishte ndodhur që nga pandemia e Covid-19.