Partia e majtë e kryeministrit të Kosovës Albin Kurti ka fituar shumicën e vendeve në zgjedhjet parlamentare, por pa mundur dot të sigurojë e vetme shumicën, duke e detyruar atë të kërkojë një aleat për të formuar qeverinë e ardhshme, tregojnë rezultatet paraprake.
Votimi i së dielës ishte vendimtar në përcaktimin se kush do ta udhëheqë Kosovën mes bisedimeve të ngecura për normalizimin e marrëdhënieve me Serbinë dhe pyetjeve të vazhdueshme mbi financimin e huaj për një nga vendet më të varfra të Evropës.
Rezultati i zgjedhjeve
Zgjedhjet e 9 shkurtit shënuan herën e parë që nga pavarësia në 2008 që parlamenti i Kosovës përfundoi një mandat të plotë katërvjeçar. Sipas Komisionit Qendror të Zgjedhjeve, organi drejtues i zgjedhjeve, pas numërimit të të gjitha kutive, 2533 të tilla, ashtu si edhe pritej Lëvizja Vetëvendosje renditet në krye me numrin më të madh të votave, por deri tani rezulton të ketë siguruar vetëm 41.14% të tyre, pa e përsëritur dot suksesin e zgjedhjeve të vitit 2021, kur siguroi pa shumë mundim mbi 50 për qind të votave dhe krijimin e rehatshëm të qeverisë.
E dyta renditet Paria Demokratike e Kosovës me 22.42% me 177890 vota, ndërsa e treta është Lidhja Demokratike e Kosovës me 17.66%, me 140100 vota.
Aleanca për Ardhmërinë e Kosovës dhe Nisma kanë marrë 7.48%, me konkretisht 59356 vota nga qytetarët e Kosovës. Më pas në renditje vjen SRPSKA LISTA me 3.84 %(30495 vota) dhe Koalicioni për Familje 2.29%, 18191 vota.
Të drejtë vote në këto zgjedhje kishin 1,970,944 qytetarë, ndërsa kanë votuar 799,954 prej tyre.
Pritshmëritë pas zgjedhjeve
Kurti mbeti optimist, megjithëse vërejtjet e tij nuk dhanë asgjë në lidhje me kë ai planifikon të kërkojë t'i bashkohet qeverisë së tij të koalicionit. “Populli fitoi. Vetëvendosje! fitoi. Ne jemi fituesit që do të formojmë kabinetin e ardhshëm”, u tha Kurti gazetarëve ndërsa mbështetësit e tij dolën në rrugë për të festuar.
Një pjesëmarrje paraprake pas 92% të votave të numëruara ishte 40.6% - rreth 7% më e ulët se katër vjet më parë. Parlamenti i ri me 120 vende rezervon 20 vende për pakicat pavarësisht nga rezultatet e zgjedhjeve, 10 prej tyre për minoritetin serb.
Qeveria e re e Albin Kurtit do të përballet me sfida të shumta pas ngrirjes së ndihmës së jashtme të Uashingtonit dhe pezullimit të financimit të Bashkimit Evropian për disa projekte gati dy vjet më parë. Qeveria e tij është gjithashtu nën presion për të rritur pagat dhe pensionet, si dhe për të përmirësuar arsimin dhe shërbimet shëndetësore dhe po ashtu, për të luftuar varfërinë.
Kosova, me një popullsi prej 1.6 milionë banorësh, është një nga vendet më të varfra në Evropë me një prodhim të brendshëm bruto vjetor prej më pak se 6.000 euro për person.
Veç objektivave që duhet të përmbushë, qeveria e kryesuar nga Albin Kurti gjithashtu ka të ngjarë të përpiqet të riparojë lidhjet me fuqitë perëndimore. Në mandatin e parë kabineti i tij ndërmori disa hapa që ngritën tensione me Serbinë dhe serbët etnikë të Kosovës, përfshirë ndalimin e përdorimit të monedhës serbe, dinarit dhe dinarit për serbët e Kosovës. Në mandatin e dytë, Kurtit i duhet të punojë për të garantuar stabilitet në rajon si dhe të përmirësojë marrëdhëniet me perëndimin.
