Negociatorët izraelitë ndodhen në Egjipt, ku po diskutojnë me ndërmjetësit egjiptianë çështjen e pengjeve të mbajtura nga Hamasi, si pjesë e bisedimeve për vazhdimin e armëpushimit në Gaza.
Lajmin e bëri me dije zyra e Kryeministrit izraelit.
"Duke ndjekur udhëzimet e kryeministrit (Benjamin) Netanyahu, përfaqësuesit e ekipit negociator po takohen aktualisht me zyrtarë të lartë egjiptianë për të diskutuar çështjen e pengjeve", shkruhej në deklaratën për mediat, një ditë pasi Izraeli njoftoi se po vazhdonte bisedimet me lëvizjen islamike palestineze.
